Хитайниң уйғур районидики “туғқанчилиқ” сиясити хитай өлкилиригә йүзлинишкә башлиди

Мухбиримиз әркин
2017.08.25

Уйғур аптоном районлуқ партком секретари чен чүәнгониң йәрлик хәлқләр билән хитайларни өз-ара “туғқан” қилиш сиясити хитай өлкилиригә йүзлинишкә башлиған.

Хитай ахбарат васитилириниң хәвәр қилишичә, йәрлик даириләр йеқинда хотәнниң керийә, нийә, чира қатарлиқ наһийәлиридин 18 аилилик бир гуруппа тәшкилләп, хитайниң бейҗиң, тйәнҗин қатарлиқ шәһәрлиригә зиярәткә уюштурған.

10‏-Авғуст башланған зиярәт 6 күн давам қилған болуп, униңға һәр бир аилидин бир бала вә чоңлардин бир киши қатнаштурулған. “тәңритағ тори” ниң хәвиридә қәйт қилишичә, зиярәт уйғур аилиләрниң туғқан тепишини мәқсәт қилған болуп, зиярәтчиләр бейҗиң, тйәнҗин қатарлиқ шәһәрләрдә шу йәрлик хитай аилиләр билән “җуңго әнәниви мәдәнийити” ни намаян қилиш тема қилинған һәр хил паалийәтләргә қатнашқан.

Бу, чен чүәнгониң йәрлик милләтләр билән хитайлар өз-ара “туғқанчилиқ” орнитиш пикри уйғур районида рәсмий сиясәт сүпитидә иҗра қилинишқа башлиғандин буян даириләрниң тунҗи қетим уйғурларни хитай өлкилиридики хитайлар билән туғқанлишиш” қа уюштурушидур.

Чен чүәнгониң “туғқанчилиқ” сиясити уйғур тәшкилатлириниң қаттиқ тәнқидигә учрап кәлгән болсиму, бирақ йәрлик даириләр “туғқанчилиқ” сияситини ақлап, униң ‏2009‏-йилдики “5‏-июл вәқәси” пәйда қилған уйғур-хитай оттурисидики кәскин бөлүнүшни пәсәйтишкә пайдилиқ икәнликини илгири сүрүп кәлди.

Уйғур тәшкилатлириниң қәйт қилишичә, бу хил мәҗбурий “туғқанчилиқ” сиясити уйғурларниң мәдәнийәт кимликини аҗизлаштуруп, уларни хитай җәмийитигә ассимилятсийә қилишни мәқсәт қилған. Улар, бу сиясәт хитайниң уйғур мәдәнийәт кимликини аҗизлитиш йолидики ана тилни чәкләш, диний етиқатни контрол қилиш, тарихини бурмилаш қатарлиқ һәр хил сиясәтлириниң бир парчиси икәнликини тәкитләп кәлгән. “тәңритағ тори” ниң билдүрүшичә, хотән вилайәтлик парткомниң муавин секретари җаң вей бу паалийәткә баһа берип, бу, уларниң “җуңхуа миллити, җуңхуа мәдәнийитини етирап қилишини күчәйтиду” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.