Amérika hökümiti Uyghur qiz-chokanlirining tughmas qiliwétilishige qarshi tedbir élishqa chaqirildi

Muxbirimiz eziz
2020-07-04
Élxet
Pikir
Share
Print

Yéqindin buyan xitay hökümitining Uyghurlar diyaridiki mejburiy yolgha qoyuwatqan tedbirliridin qiz-chokanlarni mejburiy tughmas qiliwétishi xelq'aragha köplep melum bolushqa egiship, bu qilmishni "Qirghinchiliq" dep atash heqqidiki chuqanlar tushmutushtin otturigha chiqishqa bashlidi. Buning bilen amérika hökümiti xitay hökümitining bu qilmishigha qarita yéngidin jaza qollinish üchün jiddiy muzakire basquchigha kirdi.

2-Iyul küni amérika dölet mejlisi qarmiqidiki xitay ishliri ijra'iye komitétining re'isliridin awam palata ezasi jéymis mekgowérn we kéngesh palata ezasi marko rubyo amérika tashqi ishlar ministiri mayk pompéyo we amérika maliye ministiri stiwén minuchin'gha birleshme mektup yollidi. Bu mektupta ular xitay hökümitining Uyghurlar diyaridiki qiz-chokanlarni türlük tébbiy wasitiler arqiliq mejburiy tughmas qiliwétish qilmishigha qarshi küchlük inkas qayturushni jiddiy telep qildi.

Birleshme mektupta nöwette Uyghurlar diyarida mejburiy yosunda ijra qiliniwatqan Uyghur qiz-chokanlirini tughmas qiliwétish tedbirlirining mahiyette gherezlik halda Uyghur a'ililirini weyran qilish, ularning medeniyet we diniy étiqadini yoq qilishtek depsendichilik qilmish ikenliki alahide körsitilish bilen birge amérika hökümitidin bu mesilige qarita keskin ipade bildürüsh telep qilindi. Mektupta "Biz silerning bu yirginchlik qilmishni eyiblep qoyush bilenla boldi qilmastin, mushu qabahetlik jinayetke jawabkar xitay emeldarlirigha jaza qollinishinglarni telep qilimiz" déyilidu. Shundaqla amérika hökümitini "Bu wehshiyane jinayetlerge we qirghinchiliq qilmishlirigha xitay hökümiti jawabkar bolushi lazimmu-yoq" dégen mesile heqqide bir resmiy qarar élishqa chaqirdi.

Bu mektupta yene xitay hökümitining Uyghur nopusini kontrol qilishigha biwasite yardemliship, qiz-chokanlarni tughmas qiliwétishke ishtirak qilghan xitay emeldarlirigha we xitay sehiye teshkilatlirigha "Yer shari magéntiski qanuni" boyiche jaza qollinish, shundaqla birleshken döletler teshkilatidiki bashqa döletler bilen birlikte b d t ning Uyghurlar diyarida ijra boluwatqan türlük siyasetlerni tekshürüshini qolgha keltürüsh, shundaqla Uyghurlar diyarigha mes'ul bolghuchi alahide mupettish belgilesh qatarliqlar telep qilindi. Mektupning axirida "Uyghur qiz-chokanlirigha qolliniliwatqan bu wehshiyane tedbirlerge da'ir delil-ispatlar amérika hökümiti we dunya jama'itidin küchlük heriketke ötüshni telep qilidu. Emdi buninggha qarshi heriket bashlashning peyti keldi" déyilidu.

Mezkur birleshme mektupqa amérika awam we kéngesh palata ezaliridin 76 kishi imza qoyghan bolup, bu hazirghiche nahayiti köp sandiki dölet mejlisi ezaliri imza qoyghan birleshme mektuplarning biri hésablinidiken.

Toluq bet