«جۇڭگو تۈركىي تىللار ئېتىمولوگىيە خەلقئارا ئىلمىي مۇھاكىمە يىغىنى» بېيجىڭدىكى مىللەتلەر ئۇنىۋېرسىتېتىدا ئۆتكۈزۈلگەن

مۇخبىرىمىز قۇتلان
2016-10-29
ئېلخەت
پىكىر
Share
پرىنت

«جۇڭگو تۈركىي تىللار ئېتىمولوگىيە تەتقىقاتى خەلقئارالىق ئىلمىي مۇھاكىمە يىغىنى» 2016 - يىلى 10 - ئاينىڭ 22 - ۋە 23 - كۈنلىرى بېيجىڭدىكى مەركىزىي مىللەتلەر ئۇنىۋېرسىتېتىدا ئۆتكۈزۈلگەن.

مەزكۇر مۇھاكىمە يىغىنغا تۈركىي تىللار تەتقىقاتى بىلەن شۇغۇللىنىۋاتقان خىتاي ۋە چەت ئەللەردىكى تىل تەتقىقاتچىلىرىدىن 35 نەپەر مۇتەخەسسىس قاتناشقان ھەمدە ئۆزلىرىنىڭ مەخسۇس تېمىلاردىكى ئىلمىي ماقالىلىرىنى ئوقۇغان.

يىغىنغا خەلقئارا تۈركولوگىيە ساھەسىدە تونۇلغان ئالىملاردىن «تۈركىي تىللار دىۋانى» نى ئىنگىلىز تىلىغا تەرجىمە قىلغان چىكاگو ئۇنىۋېرسىتېتىنىڭ پروفېسسورى روبېرت دانكوف، گېرمانىيەدىكى قەدىمكى ئۇيغۇر تىلى مۇتەخەسسىسلىرىدىن پېتىر زىمې ۋە مارسېل ئەردال، تۈركىيەدىكى تىلچىلاردىن پروفېسسور ئايشە مەلەك ئۆزيەتكەن خانىم بىلەن دوكتور مەھمەت ئۆلمەز، شىۋېتسىيە ئۇپسالا ئۇنىۋېرسىتېتىنىڭ پروفېسسورى لازىئو كارولۇ قاتارلىقلار قاتناشقان.

بۇ قېتىمقى ئىلمىي مۇھاكىمە يىغىنىدا قەدىمكى تۈركىي تىلى بىلەن يېزىلغان ۋەسىقىلەرنىڭ تىلى ھەم قۇرۇلمىسى، قەدىمكى ئۇيغۇر تىلىدا يېزىلغان بىر قىسىم ۋەسىقە - ھۆججەتلەر ۋە ئۇلاردا قوللىنىلغان سۆزلەرنىڭ ئېتىمولوگىيەسى، ھازىرقى زامان ئۇيغۇر، قازاق، قىرغىز ۋە سېرىق ئۇيغۇر تىللىرىدىكى بىر قىسىم سۆزلەرنىڭ ئېتىمولوگىيەسى ھەمدە بىر قىسىم خىتايچە - ئۇيغۇرچە سۆزلەرنىڭ مەنبەسى قاتارلىق تېمىلاردا يېزىلغان ماقالىلار ئوقۇلغان.

ئىگىلىنىشىچە، يېقىنقى يىللاردىن بۇيان خىتاي ھۆكۈمىتى زور مىقداردا مەبلەغ ئاجرىتىپ ياۋروپا كۇتۇپخانىلىرى ۋە مۇزېيلىرىدا ساقلىنىۋاتقان قەدىمكى ئۇيغۇر تىل - يېزىقىدىكى ماتېرىياللارنى توپلاشقا باشلىغان. شۇنىڭ بىلەن بىر ۋاقىتتا يەنە غەرب ئەللىرىدە ئۇيغۇر تەتقىقاتى بىلەن شوغۇللىنىپ كۆزگە كۆرۈنگەن ئالىملارنى ھەر خىل ناملاردا خىتايغا تەكلىپ قىلىپ، ئۇلارنى ئىدىيە جەھەتتىن كونترول قىلىشقا ئۇرۇنماقتىكەن.

پىكىرلەر (0)
Share
تولۇق بەت