Rabiye qadir xanim “Türkiye özining qanun döliti ikenlikini dunyagha namayan qildi” dédi

Dunya Uyghur qurultiyi re'isi rabiye qadir xanim türkiyediki réyna térrorchisining tirik qolgha chüshkenliki munasiwiti bilen türk saqchilirini tebriklep bayanat élan qildi.

Uyghur démokratiye we kishilik hoquq fondining tor bétide élan qilin'ghan bayanatta rabiye xanim, türk saqchilirining 39 kishining jénigha zamin bolghan da'ish térrorchisi turuwatqan öyge bu térrorchida qoral bolush we özini partlitish xewpige qarimay turup bösüp kirip, térrorchigha qoral ishletmey turup uni boysundurup, tirik qolgha chüshürüshini “Peqet bir maharet we tejribe mesilisi emes, belki insaniy hem qanuniy exlaq mesilisi” dep körsetti.

U sözide, bu jasaretning xitayning “Térrorluqqa qarshi urushi”ning derdini tartiwatqan Uyghurlar üchün bashqiche ehmiyetliklikini eskertip turup “Eger esenyurttiki shu sehnide xitay saqchiliri bolghan bolsa pütün bina qoralliq saqchi we tankilar bilen qorshalghan, saqchilar bina ichige kirmestin, öy ichige bomba atqan yaki aptomatta oqqa tutqan bolatti. Bügün sherqiy türkistanda boluwatqini del shu xil ehwaldur” dégen.

Rabiye xanim bayanatida, 2015-yili 11-ayning 14-küni, xitay qoralliq qisimlirining bir gharda yoshurunup yatqan, qolida qorali bolmighan, 56 kün qéchip madarimu qalmighan, arisida ayallar we balilarmu bolghan bir guruppa kishilerni ot chachar arqiliq köydürüp öltürgendin kéyin “28 Térrorchini pak-pakiz taziliwettuq” dep tentene bilen xewer bergenlikini, téxi mushu ayning 8-küni xitay da'irilirining yene namelum bir weqege chétishliq 3 neper térrorchini étiwetkenlikini xewer qilghanliqini misal keltürüp, réyna térrorchisining tirik qolgha chüshürülüshini xitay saqchi qisimlirining Uyghur élidiki weqelerni bir terep qilish usuli bilen sélishturma qilghan we “Bu herikiti arqiliq türkiye döliti özining bir qanun döliti ikenlikini yene bir qétim dunyagha namayan qildi” dégen.

Türkiye qoralliq saqchiliri yéngi yil kéchisi réyna kulubigha aptomat bilen basturup kirip 39 kishini oqqa tutup öltürgen térrorchi abduqadir masharipofni istanbulning esenyurt rayonidiki bir binada 16-‏yanwar küni tirik qolgha chüshürgen idi. U qolgha chüshkendin kéyin özining jinayitini étirap qilghan we uning özbékistanning qoqan shehiridin bolghanliqi aydinglashqan idi. Buning bilen deslepki künlerde bu térrorchining Uyghur bolush éhtimalliqi heqqide tarqalghan xewerlerningmu yalghanliqi melum bolghan. Rabiye qadir xanim bayanati dawamida bu mesilinimu tilgha élip, ré'ina térrorchisining tirik tutulushi we uning Uyghur emesliki aydinglashqandin kéyin, bir qisim axbarat wasitiliride, bolupmu xitay axbaratlirida bérilgen saxta xewerlerning inkar bolup, xitay emeldarlirining ré'ina qetli'amidin kütken pursetliri'iningmu sugha chüshkenlikini bildürdi.