UHRP Amérika yéngi hökümiti we dölet mejlisidin xitayning Uyghur qirghinchiliqigha téximu küchlük siyaset qollinishni telep qildi

Uyghur kishilik hoquq qurulushi (UHRP) 12-ayning 3-küni doklat élan qilip, 2025-yili, amérika hökümiti choqum xitayning Uyghur qirghinchiliqigha qarita téximu küchlük siyasetlerni yolgha qoyup, kishilik hoquqni we amérikaning igilik hoquqini qoghdash üchün dölet halqighan basturushqa qarshi turushta hel qilghuch tedbir qollinishi kéreklikini ilgiri sürgen.

Doklatta körsitilishiche, Uyghur kishilik hoquq qurulushi ijra'iye diréktori ömer qanat mundaq dégen: “Amérika magnitskiy kishilik hoquq jazasini kéngeytishi kérek. Chet elning arilishishini tosup, Uyghur irqi qirghinchiliqining aldini élish üchün küchlük tedbir qollinishi intayin muhim” .

Doklatta yene Uyghur kishilik hoquq qurulushining tashqi ishlargha mes'ul diréktori lu'isa giriw (Louisa Greve) mundaq sözi bérilgen: “Xitay emeldarlirining amérika tupriqidiki Uyghur pa'aliyetchiliri, zhurnalistlar we öktichilerni nishanlash we qorqutush qatarliq chégra halqighan wehshiy basturushliri amérika asasiy qanunidiki asasiy erkinlikke tehdit salidu”.

Uyghur kishilik hoquq qurulushi 2025-yili 1-ayda ish bashlaydighan donald tramp pirézidéntliqidiki amérika hökümiti we 119-nöwetlik amérika dölet mejlisidin asasliqi töwendikilerni telep qilghan: irqi qirghinchiliq sadir qilghanlarni jazalash, amérika dölet mejlisi, yer shari magnitskiy qanuni boyiche 12 xitay emeldarigha qaratqan jazaning dawamlishishini kapaletke ige qilish üchün 2025-yili 6-ayda waqti toshidighan 2020-yili testiqlan'ghan “Uyghur kishilik hoquq siyasiti qanuni” ni qaytidin küchke ige qilish, “Uyghur mejburiy emgiki qanuni” qet'iy we toluq ijra qilish.

Uyghur kishilik hoquq qurulushi uningdin bashqa yene amérika hökümitidin xitayning Uyghur élidiki wehshiylikige yardem bériwatqan DJI, daxu'a (Dahua), xakwisin (Hikvision) yeni xeykang qatarliq pen-téxnika shirketlirige keng-kölemlik jaza bérishni telep qilghan.