Wichat ep détali tik-toktin xeterlikmu?

Wichat (ündidar) supisi pütün dunyada xitaylar eng köp qollinidighan we eng alqishqa érishken alaqe supisi bolup, “Wol-sitrét zhurnili” ning 24-yanwar küni élan qilghan bir maqaliside, wichatning tik-toktin xeterlik ikenliki otturigha qoyulghan.

Bu maqalide körsitilishiche, wichat xitay kompartiyesining sanliq melumat oghrilash, puqralarni nazaret qilish, xitay kompartiyesini teshwiq qilish we xata uchur tarqitish wasitisi bolup, bu détalni ishlitidighan abontlar künige ottura hésab bilen 19 milyon etrapida iken. Amérika dölet mejlisi tik-tokni hökümet organlirida ishlitishni chekligen؛ emma xitay epliridin kelgen tehditke taqabil turush üchün wichatqimu sel qarimasliqi kérek iken.

Téngshün shirkiti 2011-yili bazargha salghan wichat xitaydiki bir milyard adem her küni ishlitidighan ep bolupla qalmay, amérikadiki xitaylar üchünmu eng muhim alaqe wasitisi we xewer menbesi iken. Emma u xitayning téxnika mehsulati bolghachqa, xitay hökümitining keng kölemlik közitish torining muhim bir qismi hésablinidiken؛ wichattiki abontlarning pa'aliyiti iz qoghlap tekshürülidiken, tehlil qilinidiken we gumandarlar hökümetke melum qilinidiken. Wichatning algorizimliq iqtidari xitay kompartiyesining bayanlirini teshwiq qilish, ulargha qarshi yollan'ghan uchurlarni öchürüsh, azlitish yaki süziwélish wezipisini öteydiken.

Uningdin bashqa, amérikadiki xitaylar wichat oynighanda da'im amérikaliqlarning xitaylarni kemsitidighanliqi, qoral étip adem öltürüsh weqelirining üzülmeydighanliqi, kowid bilen ölgen ademlerning kochida yétip qalghanliqi dégendek mezmunlarni köridiken. Buningdiki meqset xitaylarni yaki xitayche bilidighanlarni xitayning amérikadin yaxshi dölet ikenlikige ishendürüsh iken.

Shuning bilen bir waqitta amérikadimu xitay üchün ishleydighan “50 Tiyinliqlar” lar köp bolup, ularning téxi amérika pasporti we yéshil karti bar iken. Emma amérika fédratsiye tekshürüsh idarisi ulargha tüzük chare qollanmay kéliwétiptu.