Xelq'aradiki dangliq ikki ilmiy zhurnal Uyghurlarning DNA sini ishletken xitay tetqiqatchilirining ikki maqalisini bikar qilghan

Xelq'aradiki ikki nupuzluq ilmiy zhurnal xitay gén tetqiqatchilirining bu zhurnalda élan qilin'ghan ikki parche maqalisini Uyghurlarning DNA sini ruxsetsiz ishletkenliki üchün bikar qilghan.

Melum bolushiche, xitay gén tetqiqatchilirining bu herkiti “Ilmiy tetqiqat exlaqigha xilap” dep qaralghan. Xitay hökümiti 2017-yili bashlan'ghan chong tutqunda az dégenda bir milyon Uyghurni lagér we türmilerge qamash bilen bir waqitta, Uyghurlarning DNA ewrishkisini mejuriy yighip, zor kölemlik DNA ambiri qurghan.

Bu DNA ambiridiki uchurlar xitay dölet xewpsizliki organlirining bixeterlik tedbirlirini tereqqiy qildurushi hemde her xil mexpiy tetqiqat we adem ichkiy ezalirini köchürüshte ishlitilip kélin'gen iken. “Amérika awazi” ning xewer qilishiche, bu ikki parche maqale ilgiri “Xelq'ara qanun tibabiti zhornili” we “Insan génétikisi” zhornilida élan qilin'ghan iken.

Bu ikki parche maqale bir qanche xitay tetqiqatchisi teripidin birliship yézilghan bolup, uning aptorlirining biri xitay jama'et xewpsizliki ministirliqigha qarashliq qanun tibabiti tetqiqat ornining tetqiqatchisi li seyshya iken.

Xewerde bu tetqiqat ornining bu yil 5-ayda amérika hökümiti teripidin “Qara tizimlik” ke kirgüzülgenliki, uning Uyghurlarni depsende qilip, keng kölemlik tutqun qilish, mejburiy emgekke sélish, yuquri téxnikaliq nazaret qilishta xitay hökümitige hemdemde bolush bilen eyiblen'genlikini bildürgen.

Xewerde éytishiliche, “Xelq'ara qanun tibabiti zhornili” 7-séntebir bayanat élan qilip, bu maqalining élip tashlan'ghanliqini bildürgen. Buning aldida “Insan génétikisi” zhornili bayanat élan qilghan iken.