2023-Yili Uyghur emgek küchlirini xitay ölkilirige yötkesh kölimi téximu kéngeygen

Washin'gtondin muxbirimiz erkin teyyarlidi
2024.02.20

Amérikadiki “Kommunizm qurbanliri xatire fondi” ning aliy tetqiqatchisi, doktor adriyan zénz ötken hepte yene yéngi doklat élan qilip, 2023-yili xitayning Uyghur mejburiy emgek küchlirini xitay ölkilirige yötkesh kölimining ilgiriki herqandaq waqittin téximu kéngeygenliki we bu siyasetning xitay rehbiri shi jinpingning qollishigha érishkenlikini bildürgen.

Doklatta qeyt qilinishiche, Uyghur diyaridiki bezi jaylarda 90 pirsent yerlik déhqan ahalisining yéri tartiwélinip, dölet igilikidiki xitay karxanilirigha ötküzüp bérilgen, shundaqla yerlik ahaliler emgek küchlirini mejburiy yötkesh pirogrammisi arqiliq ma'ashqa tayinidighan emgek küchlirige aylandurulghan.

Ariyan zénzning “Shinjang Uyghur aptonom rayonidiki mejburiy emgek: 2023-yili we 2024-yillirining bashliridiki emgek küchlirini mejburiy yötkeshning dawamlishish ehwalini bahalash” namliq doklati amérikadiki nopuzluq tetqiqat orunliridin “Jéymis town fondi” ning torida élan qilin'ghan.

Doklatta qeyt qilinishiche, xitay kompartiyesining siyasiti we dölet pilanigha a'it höjjetlerdin xitayning Uyghur rayonidiki mejburiy ishqa orunlashturush we namratliqtin qutquzush siyasetlirining az dégende 2025-yilighiche dawamlishidighanliqi we uning hazirmu dawamlishiwatqanliqi melum bolmaqta iken. Doklatta, 2023-yili xitayning nishanliq yardem bérish pirogrammisining kölimi kéngeytilip, xitay ölkilirige emgek küchi yötkeshning 38 pirsent köpeytilip, 2010-yildin buyanqi eng yuqiri nuqtigha yetkenliki bildürülgen. Doklatta yene 2023-yili xitayning Uyghur diyaridiki “Ishsizliqni közitish we aldin signal bérish méxanizmi” kéngeytilip, töwen kirimdiki ahalilerning kirimi we xizmet ehwalini nazaret qilish kücheytilgen. Bu doklat xitay hökümiti Uyghurlargha irqiy qirghinchiliq qilghanliqi we mejburiy emgekke tutqanliqini qet'iy ret qilip, küchlük diplomatik we teshwiqat hujumigha ötken bir peytte élan qilin'ghan. Doklatta qeyt qilinishiche, xitay hökümiti 2023-yili Uyghur diyarida yötkep ishqa orunlashturushni kücheytish bilen bir waqitta yene kespiy maharet terbiyesinimu kücheytken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.