“шинҗаң токини ичкиригә йәткүзүш” қурулуши ғайәт зор көләмгә йәткән

“хитай хәвәрлири тори” ниң 19-май күни чиқарған хәвиригә қариғанда, “шинҗаң токини ичкиригә йәткүзүш” қурулуши башланғандин буян һазирғичә, уйғур районидин ичкири хитайға тошулған токниң миқдари җәмий 640 милярд киловатқа йәткән.

“шинҗаң токини ичкиригә йәткүзүш” қурулушиниң биринчи ток йоли қумулдин дунхуаңғичә болуп, 2010-йил 11-айда тамамланған; иккинчи ток йоли дунхуаңдин шаҗоғичә болуп, 2013-йил 6-айда тамамланған; қумулдин җеңҗуғичә юқири бесимлиқ ток йоли 2014-йил 1-айда тамамланған болуп, “шинҗаң билән оттура түзләңликни туташтурғучи електр йипәк йоли” дәп аталған. Дуня бойичә әң юқири бесимлиқ вә әң көп миқдарлиқ ток йоли шәрқий җуңғарийәдин җәнубий әнхуй наһийәлиригичә туташтурулған ток йоли болуп, уйғур райони билән ичкири хитай арисидики муһим електр ториға айланған.  Бу йил хитай һөкүмити йәнә қумулниң шималидин чуңчиңғичә болған үчинчи ток йолини қурушни пиланлаветипту.

Мәлуматларға қариғанда, һазир уйғур райони хитайниң әң муһим енергийә ишләпчиқириш базисиға айланған болуп, нефит тәбиий газ, көмүр байлиқида хитай бойичә биринчи, қуяш вә шамал енергийәси байлиқида иккинчи орунда туридикән. Хитай һөкүмити ичкиригә тәминләватқан ток асасән көмүрни йеқилғу қилидиған от електр истансиси болуп, муһитни булғаш дәриҗиси әң еғир һесаблинидикән.

Дуня уйғур қурултийиниң баянатчиси дилшат ришит радийомизға қилған сөзидә, хитайниң бу пиланиниң уйғур райониниң екологийәлик муһитини бузуп, һавасини булғап, йәрлик аһалиләргә зиян елип келидиғанлиқини билдүргәниди.