Xitay da'iriliri bortala oblastining mu'awin bashliqi mahmutjan baratning wezipisidin élip tashlighan

Xitay da'iriliri bortala oblastining mu'awin bashliqi mahmutjan baratning wezipisidin élip tashlap, uning üstidin délo turghuzushni qarar qilghan.

“Xelq tori” ning xewer qilishiche, mahmutjan barat “Ghaye-étiqatini yoqatqan, siyasiy éngi we partiyewiylik prinsipi yoq…teshkilning tekshürüshige qarshiliq körsitip, bashqilar bilen til biriktürüwalghan, chet'elge chiqip tekshürüsh mezgilide liniyeni öz béshimchilik bilen özgertken, alaqidar shexsiy ishlirini doklat qilmighan, dölet mülkini igiliwalghan, zor miqdardiki mal-mülükni qanunsiz qobul qilghan,” dep eyiblen'gen.

Mahmutjan barat xitayning 2017-yili bashlan'ghan chong tutqunidin béri intizamgha we qanun'gha xilapliq qilish bilen eyiblinip, wezipisidin élip tashlan'ghan we qanuniy jawabkarliqqa tartilghan köpligen yuqiri derijilik Uyghur kadirlirining yene biridur. Chong tutqunda nurghun Uyghur kadirlar “Bölgünchilik”, “Ikki yüzlimichilik” yaki “Rezil küchlerni qanat astigha élish” dégen jinayetler bilen eyiblinip, lagér we türmilerge qamalghan. Bezilirige muddetsiz qamaq yaki ölüm jazasi bérilip, nurghun Uyghur kadirlar hakimiyet organliridin tazilan'ghan idi.

“Xelq tori” ning bildürüshiche, Uyghur aptonom rayonluq intizam tekshürüsh we réwiziye komitéti mahmutjan baratning pütün wezipilirini élip tashlap, partiyedin qoghlap chiqirishni shundaqla uning üstidin délo turghuzup tekshürüshni qarar qilghan. 1963-Yili tughulghan mahmutjan barat jing nahiyesidin bolup, u tutqun qilinishtin burun bortala oblastining mu'awin bashliqi, bingtu'en 5-déwiziyesining mu'awin déwiziye bashliqi qatarliq wezipilerni ötigen idi.