Uyghur mejburiy emgikige chétishliq paxta mehsulatlirini tekshürüp éniqlash wezipisi yenila éghir iken

Washin'gtondin muxbirimiz jewlan teyyarlidi
2023.09.05

“Ruytérs agéntliqi” ning yéqinda xewer qilishiche, amérika tamozhna we chégra qoghdash idarisi 5-ayda tekshürgen ayagh we kiyim-kécheklerning 27 pirsenti Uyghur rayonidin chiqidighan paxta bilen munasiwetlik iken. Ilgiri melum bolmighan bu netije amérikaning “Uyghur mejburiy emgikining aldini élish qanuni” ni ijra qilishta qanchilik müshkülatqa duch kelgenlikini körsitip béridiken.

Bu qanunni ijra qilish üchün tamozhna xadimliri paxta mehsulatlirini izotopluq sinaq-tejribidin ötküzüsh arqiliq uning terkibidiki karbon we hidrogén éléméntlirining qoyuqluq derijisini éniqlap, uni kéwez östürülgen rayonning jughrapiyelik alahidiliki bilen baghlaydiken.

Tamozhna we chégra qoghdash idarisi 5-ayda 37 xil kiyim-kéchekni ewrishke élip tekshürüp, 10 xilini “Shinjang bilen mas kelgen” dep qarap qayturuwetken. Buning ichide mikkiy (Mickey) markiliq qisqa yeng mayka paxta bilen nilondin ishlen'gen bolup, buninggha oxshash murekkep ehwallar mejburiy emgek terkiblirini éniqlashta qiyinchiliq tughdurghan.

Xewerde éytilishiche, paxta mehsulatlirini izotopluq analiz qilish amérika tamozhna we chégra qoghdash idarisining kündilik meshghulati emesken, ular peqet mejburiy emgekke chétishliq dep melum qilin'ghan mehsulatlarnila tekshüridiken. Ular  2020-yildin buyan, paxta mehsulatlirini izotopluq tekshürüshni yéngi zélandiyediki oriteyin (Oritain) shirkitige hawale qilghan bolup, buninggha 1 milyon 300 ming dollar xejligen. Victoria’s Secret, Ralph Laruen, Shein Qatarliq dangliq shirketler paxta mehsulatlirining menbesini tekshürüsh toghruluq oriteyin bilen kélishim imzalighan؛ emma oriteyin shirkitining u mehsulatlarni qanchilik tekshürüwatqanliqi éniq emesken, yene kélip, bu shirket ötken yil 12-ay, bu yil 4-ay we 5-ayda tekshürgen ayagh we kiyimlerni ishlepchiqarghan karxanilarning ismini bermigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.