Jorj tawn uniwérsitétining qanun fakultéti oqughuchiliri amérikadiki Uyghur panahlan'ghuchilarning ishlirini tézlitish üchün heriketke ötken

Washin'gtondin muxbirimiz irade teyyarlidi
2024.05.09

Amérikadiki jorj tawn uniwérsitétining qanun fakultéti qarmiqidiki kishilik hoquq instituti (Human Rights Institute) amérikadiki Uyghur panahlan'ghuchilarning panahliq ishlirini tézlitish hem qolaylashturush meqsitide mexsus xizmet guruppisi qurghan.

Bu guruppa kishilik hoquq instituti dériktori élisa massimino (Elisa Massimino) we ilgiri amérika tashqi ishlar ministirliqida xizmet qilghan skot busbi (Scott Busby) ning bashchiliq qilishi we qanun fakultétidiki oqughuchilar uyushmisi ezalirining bir arigha kélishi bilen qurulghan. Amérikadiki musapirlar ishlirini bir terep qilidighan idarining xizmetliri astilap ketken bir ehwalda, ular xitay hökümitining dölet halqighan basturushining tehditige uchrawatqan Uyghurlarning panahlinish ishlirini tézrek hel qilish üchün pa'aliyet bashlighan؛ buning üchün amérikadiki Uyghur pa'aliyetchiler, lagér shahitliri we amérika dölet mejlisining bir qisim ezaliri bilen uchriship, bu mesilini hel qilishning yolliri heqqide köp qétim pikir almashturghan.

Yéqinda bu guruppa amérika ana weten bixeterliki ministirliqining ministiri mayorkasqa (Alejandro Mayorkas) qayil qilarliq mektup ewetip, uningdin xitay hökümitining dawam qiliwatqan irqiy qirghinchiliq we dölet halqighan basturushigha uchrawatqan Uyghurlarning panahliq telipini bir terep qilishni aldinqi orun'gha qoyushni telep qilghan. Ana weten bixeterliki ministirliqi ministiri mayorkas ularning bu muraji'etnamisige derhal jawab qayturghan we özlirining hazir bu mesilide qandaq ilgirileshni muzakire qiliwatqanliqini bildürgen.

Melum bolushiche, ularning bu xétige jorj town uniwérsitétidiki asiya qanun merkizining ijra'iye mudiri tomas kéllog (Thomas Kellogg) , walsh tashqi ishlar institutining piroféssori jeymis milward (James Millward) we qollinishchan qanun tetqiqat merkizi (Applied Legal Studies) ning fakultéti mudiri andréw shénxoltiz (Andrew Schoenholtz) qatarliq nopuzluq shexslermu qollap imza qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.