Olimpik kiyimliri zawuti: “Biz shinjang paxtisini dawamliq ishlitimiz!”

Xitay hökümitining Uyghur diyaridiki zor kölemlik siyasiy basturushi hemde buning biwasite netijisi bolghan Uyghurlarni mejburiy emgekke sélish qilmishini cheklesh üchün xelq'ara jem'iyet Uyghur diyaridin chiqidighan paxta mehsulatlirini men'i qilishqa bashlighanidi. Emma mexsus olimpik kiyim-kécheklirini ishlepchiqarghuchi “Enta” shirkiti yéqinda ‍özlirining Uyghur diyaridin chiqqan paxtilarni dawamliq ishlitidighanliqini jakarlighan.

“Aksyos xewerliri” ning 28-apréldiki maqaliside körsitilishiche, xitaydiki “Enta” shirkiti 2019-yili xelq'ara olimpik komitétining hawalisi boyiche tokyo olimpik musabiqisi we béyjing qishliq olimpik musabiqisi üchün tenheriket kiyimliri, jümlidin ayaq we bashqa lazimetliklerni tikishni kötüre éliwalghaniken. Ular shu yili xelq'araliq paxta ishlepchiqirishini közetküchi organ bolghan “Yaxshi paxta pilani” teshkilatigha eza bolghan hemde bu organning meshghulat qa'idisi boyiche ish körüshke wede bergen iken. Emdi bolsa ular “Yaxshi paxta pilani” ning Uyghur diyaridiki paxta ishlepchiqirishigha baghlan'ghan mejburiy emgekni eyiblishi hemde bu xil paxta mehsulatlirini ishlitishni men'i qilish heqqidiki körsetmisini bir yaqqa qayrip qoyghan.

Maqalida körsitilishiche, ularning yéqinda élan qilin'ghan yazma bayanatida “Biz shinjangdin chiqqan paxtilarni ishlitip kéliwatimiz. Kelgüsidimu dawamliq shundaq qilimiz” dégen. Nike We Adidas qatarliq xelq'araliq shirketler arqimu-arqidin Uyghur diyaridin chiqidighan paxtini ishlitishni ret qilghandin kéyin xitay istémalchiliri özlirining “Wetenperwer” ikenlikini körsitish üchün bu markilarni bayqut qilghan hemde “Enta” mehsulatlirigha yüzlen'gen.

Obzorda xitay hökümitining milletchilik xahishini kozir qilip eng eqelliy kishilik heqlerni himaye qilghan shirketlerni jazalishidek rezil qilmishi eyiblinip “Bu hal xitay kompartiyesining dunyadiki kishilik hoquq ölchemlirige mislisiz xiris peyda qiliwatqanliqining bir ipadisi” déyilidu.