Amérikaning tashqi munasiwet alahide elchisi xitayning Uyghurlar heqqidiki uchurlarni qattiq qamal qilidighanliqini éytqan

Washin'gtondin muxbirimiz jewlan teyyarlidi
2024.05.08

Amérika tashqi ishlar ministirliqi xelq'ara alaqe merkizining alahide elchisi jéymés rubin (James Rubin) xitayning her da'im amérikaning yaman xewerlirini tarqitip, xitayni maxtaydighan teshwiqatlarni bazargha salidighanliqini bildürgen؛ u yene, xitay taratqulirining Uyghurlar heqqidiki xewerlerni qamal qilidighanliqini we islam döletlirining buningdin xewersiz qalidighanliqini tilgha alghan.

“Amérika awazi” ning X hésabida élan qilin'ghan bu widiyoda, jéymés rubin xitayning dunyagha maddiy küch jehettinla emes, teshwiqat jehettinmu hökümranliq qilishqa alahide köngül bölidighanliqini we buning heqiqeten ünümlük boluwatqanliqini bildürgen.

U mundaq dégen: “Xitay taratquliri amérikada yüz bergen birer jinayet, basqunchiliq, muhit bulghinishi we chiriklik heqqidiki uchurlarni izdep tépip, derhal xewer qilidu. Shinxu'a agéntliqi xitaydiki ijabiy ishlarnila xewer qilidu, emma xitaygha paydisiz héchqandaq bir selbiy nersini bizge bildürmeydu”.

U yene xitay hökümitining Uyghurlar heqqidiki xewerlerni chekleydighanliqini tilgha élip mundaq dégen: “Shi jinping ichkiy kabinét yighinida ‛Uyghurlargha qilche rehim qilmasliq‚ dégen sözni ishletken. Xitay rehberlirimu bu yighinda Uyghurlargha qollinidighan usulini otturigha qoyghan. Némishqa pütkül musulmanlar dunyasi Uyghurlar duch kelgen wehshiylikni bilmeydu? némishqa bu mesilige köngül bölmeydu? chünki xitay öz uslubidiki teshwiqatlirini toluq we ünümlük usulda dunyagha tarqitidu. Heqiqiy ehwalni xewer qilishtin ölgüdek qachidu. Uyghur wekillirining yawropadiki yighinlargha bérishi we taratqularda gep qilishigha jan-jehli bilen qarshi turidu. Her dölettiki xitay elchixaniliri bundaq yighinning échilishighimu küchining bariche tosqunluq qilidu”.

U sözini dawam qilip, xitayning xata we yalghan uchur tarqitishqa dunyaning aldida ikenlikini hemde buningdin ünüm qaziniwatqanliqidin epsuslinidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.