Xitay hökümiti Uyghur rayonida “Yüz künde milyonlighan xizmetchi xadim qobul qilish mexsus herikiti” bashlighan

Washin'gtondin muxbirimiz irade teyyarlidi
2024.06.13

Uyghur aptonom rayonluq adem küchi bayliqi we ijtima'iy kapalet nazariti sanjida “Yüz künde milyonlighan xizmetchi xadim qobul qilish herikiti” namliq mexsus yermenkisi achqan.

Xitayning “Tengritagh tori” ning xewiride déyilishiche, 13-iyun küni bashlan'ghan bu xizmetchi qobul qilish yermenkiside Uyghur éligha jaylashqan “100 Din oshuq shirket we karxana orunlirigha xizmetchi qobul qilinidiken”. Xewerde yene, “Bu yermenkining kesipke xas alahide xizmetchi qobul qilish pa'aliyiti ikenliki, uning köp xil ishqa orunlishish mulazimiti bilen teminlep, rayonning eshya oboroti kespining yuqiri süpetlik tereqqiyatigha yardem béridighanliqi” tilgha élin'ghan.

Mezkur pa'aliyet torda we neq meydanda xizmetchi qobul qilish sheklide élip bérilghan bolup, uning 3 milyondin artuq kishini jelp qilghanliqi bayan qilin'ghan.

Uyghur aptonom rayonluq da'iriler Uyghur élining herqaysi jaylirida, bolupmu Uyghur élining eng munbet tupraqlirini üzlüksiz igilewatqan bingtüen'ge dawamliq türde her xil namlarda xizmetchi xadim qobul qilish pa'aliyetlirini kéngeytmekte. Téxi yéqinda bingtüen da'iriliri “Minglighan karxanilarda tümenligen ish orni yaritish” namidiki alahide teshwiqatini qanat yaydurghan idi.

Xitay iqtisadining chöküshi, bolupmu xitay ölkiliridiki iqtisadiy tereqqiyatning nacharlishishigha egiship, aliy mektep püttürgenlerning ishsizliq mesilisi barghanséri éghirlashqan. Mushundaq shara'itta, Uyghur rayoni bilen bingtüenning xitaydiki ishsizliqni hel qilidighan ghayet zor ish bazirigha aylinishi, diqqet qozghimaqta. Uyghur aptonom rayonluq da'irilerning bu xil heriketler arqiliq Uyghur élige téximu köp xitay köchmenlirini yötkeshni ishqa ashurush pilani, chet ellerdiki Uyghur pa'aliyetchiliri bilen Uyghur weziyitige yéqindin diqqet qiliwatqan mutexessislerni endishilendürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.