Уйғур ели адвокатларниң сотта гумандарларни ақлашқа қатнишиш нисбити әң төвән район икән

Уйғур или адвокатларниң җинайи ишлар делолирида гумандарларни ақлашқа қатнишиш нисбити әң төвән район икәнлики илгири сүрүлмәктә. 4-январ шаңхәйдики бир адвокатлиқ орни хитайдики “җүфа” намлиқ бир әдлийә көзитиш оргини тәйярлиған бу һәқтики бир тәкшүрүш доклатини чәтәл иҗтимаий таратқулирида елан қилип, күчлүк инкас қозғиди.

Доклатта көрситилишичә, уйғур аптоном районидики адвокатларниң җинайи ишлар делолирида өзиниң ролини җари қилдуруш нисбити аран 8.64 Пирсәнт икән. Көзәткүчиләр, бу уйғур елида адвокатларниң һәр 100 делодин аран 8-9 ни ақлашқа иштирак қилалайдиғанлиқидин дерәк беридиғанлиқини билдүрди. Доклатта, хитайниң бу җәһәттики мәмликәтлик оттуричә нисбити 14 пирсәнт икәнликини, буниң хитай һөкүмити елан қилғандин көп пәрқлинидиғанлиқини билдүргән.

Доклатта қәйт қилинишичә, уйғур аптоном районидин қалса, хитайниң хәйнән өлкиси билән тибәт аптоном райони адвокатларниң ақлаш нисбити әң төвән районлар һесаблинидикән. Доклатта, хәйнән өлкисиниң бу җәһәттики нисбити 6.4 Пирсәнт, тибәтниң 6.8 Пирсәнт икәнлики илгири сүрүлгән.

Доклатта көрситилишичә, “җүфа” әдлийә тәкшүрүш оргини хитайда 2014‏-йилдин 2016‏-йилғичә бир тәрәп қилинған җинайи ишлар делолирини статистика қилип, юқириқи хуласини чиқарған. Доклатта, шаңхәй шәһириниң 22.94 Пирсәнтни игиләп, бу җәһәттики әң юқири орунни игилигәнлики, әнхуй өлкисиниң 2‏‏-орунни, бейҗиңниң 3‏-орунни игиләйдиғанлиқини билдүргән. Доклатта дейилишичә, йәрлик сот мәһкимилириниң бир тәрәп қилинған делоларни торда елан қилиши изчил болмиғачқа, бу доклатта бәзи хаталиқларниң болуши мумкин болсиму, бирақ у йәнила хитай әдлийәсиниң нуқсанларни ечип беридикән.