Chaghanda aqsu shehiride 28 mingdin artuq panus ésilghan

Muxbirimiz ümidwar
2018-02-18
Élxet
Pikir
Share
Print

Xitayning bu yilqi chaghan bayrimi pütün Uyghur diyaridimu omumyüzlük panus ésish, mesnewiler we lozunkilar ésish hem bashqa tipik xitay milliy medeniyet en'enisi we wetenperwerlikni eks ettüridighan murasimlar bilen ötküzülmekte.

Xitay hökümet metbu'atliridiki süretlik uchurlardin melum bolushiche, ming yillardin buyan islam dinigha étiqad qilip, öz milliy medeniyet en'enisige ige bolup kelgen Uyghurlar, sheherlerdin tartip yéza-qishlaqlarghiche chaghan ötküzüshke teshkillen'gen. Chaghan mezgilide bezi jaylarda Uyghur ösmürlirining xitayche kiyindürülüp, pa'aliyetlerge qatnashturulghan, köpligen Uyghur déhqanlirining öylirige, hoylilirigha we ishik aldilirigha panus hem xitayche mesnewilerni asqan menzire shekillendürülgen. 

Chaghanliq bézesh ishlirigha yerlik hökümetler zor meblegh we küch ajratqan bolup, aqsu axbarat toridiki uchurda qeyt qilinishiche, aqsu sheherlik partkomning bir tutash teshkillishi bilen aqsu shehiri omumyüzlük chaghanliq keypiyatigha kirgüzülüp, aqsu shehiridiki barliq chong-kichik kocha we jama'et orunlirigha 28 ming640 dane panus ésilghan, 1781 mesnewi chaplan'ghan we 1824 teshwiqat doskisi ishlen'gen, 288 her xil chiragh we bashqa xitay milliy en'enisini eks ettüridighan chaghanliq buyumlar ésilghan. Buningdin bashqa yene kochilargha 220 xitay dölet bayriqi ésilghan iken. 

Radiyomiz ziyaritini qobul qilghan türkiyediki hajiteppe uniwérsitétining dotsénti erkin ekremning éytishiche, xitay hökümitining bu qiliwatqini xitayning chaghan bayrimi en'enisini Uyghurlargha mejburiy téngishtin ibarettur. Uning eskertishiche, buning eksiche da'iriler Uyghurlarning ming yillardin buyan étiqad qilip kéliwatqan islam dinining ramzan we qurban héyt-bayramliridiki dini we milliy en'enilirige tosqunluq qiliwatqan bolup, ramzan mezgilide Uyghurlarning roza tutushi qattiq nazaret astigha élin'ghan we cheklen'gen idi.

Toluq bet