Pasport yighiwélish siyasiti Uyghur aptonom rayonida omumyüzlük ijra qilinmaqta

Uyghur élining bir qisim jayliridiki j x organliri teripidin chiqirilghan pasport yighish heqqidiki uqturushning pütkül Uyghur éli miqyasida oxshash ijra qilinidighanliqi melum boldi.

Bir qanche kündin buyan ijtima'iy taratqularda shixenze, manas, qumul we midung shehiridiki j x tarmaqlirining 18-öktebirgiche pasportlarni tapshurup bérish heqqidiki uqturushi tarqilip, küchlük diqqet qozghighan idi. Bügün istansimiz muxbiri shixenze sheherlik jama'et xewpsizlik idarisige téléfon qilip, xewerni delillidi. Téléfon'gha chiqqan xadim pasport yighiwélish siyasitining Uyghur élining barliq jaylirida birdek ijra qilinidighanliqini éytqan.

Uning éytishiche, pasport yighiwélish heqqidiki uqturush charshenbe künidin étibaren tarqitilishqa bashlighan bolup, shixenze shehiridiki ahaliler kéler yili 2-ayning 16-künigiche pasportlirini özliri turushluq jaylardiki j x idarilirige yaki nopusi turushluq saqchixanilargha tapshurup bérishi iken.

Dunya Uyghur qurultiyi bayanatchisi dilshat rishit ependi bu heqtiki sözide, pasport yighiwélish siyasitining asasliq nishanining yenila Uyghurlar ikenlikini we buning Uyghurlarning sayahet we seper erkinlikini cheklesh, ularning shexsi uchurlirini igileshni meqset qilidighanliqini éytip, xitay hökümitining bu siyasitini tenqid qildi.