Дуня уйғур қурултийи хитайни рамизанда хитайни уйғурларниң роза тутушиға кашила қилмаслиққа чақирди

Мухбиримиз әркин
2018-05-14
Share

Дуня уйғур қурултийи 14‏‏-май рамизан һарписида баянат елан қилип, хитай һөкүмитини рамизан ейида уйғурларниң роза тутушиға кашила қилмаслиққа, уларниң диний ибадәтлирини әркин бәҗа кәлтүрүшигә капаләтлик қилишқа чақирди.

Баянатта, хитай һөкүмитиниң һәр йили рамизан ейида һөҗҗәт чүшүрүп, партийә әзалири, һөкүмәт хадимлири, оқутқучи, оқуғучиларниң роза тутуши, диний паалийәтләргә қатнишишини чәкләйдиғанлиқи, роза тутқан аммини тәқиб вә назарәт қилип келиватқанлиқи тәнқид қилинған.

Баянатта қурултай рәиси долқун әйсаниң сөзи нәқил кәлтүрүлүп, “бу хил бесим вә бастуруш еғир террорлуқ кәйпиятини кәлтүрүп чиқарди. Һәр йили рамизан ейини вәһимә вә әнсизлик қаплап, һәр бир уйғурниң роза тутуши, диний турмуши еғир тәһдиткә вә тәсиргә учрап кәлди” дейилгән.

Хитай һөкүмити 2014‏-йилдин башлап арқа-арқидин “қанунсиз диний паалийәтниң 28 хил ипадиси”, “диний ашқунлуқниң 75 хил ипадиси”, дегән бәлгилимиләрни чиқирип, сақал қоюш, һиҗаплиниш, роза тутуш, қуран вә башқа диний китабларни сақлаш, иптар бериш, һарақ ичмәслик, диний затларни һөрмәт қилиш, дуа-тилавәт қилиш, закат вә сәдиқә -питир бериштәк нормал диний ибадәт вә диний қаидә-йосунларни чәклигән. 2017‏-Йили 4‏-айда қанун чиқирип, юқиридики бир қисим ипадиләрни қанунға хилап қилмиш дәп елан қилған иди.

Дуня уйғур қурултийи дүшәнбә күни елан қилинған баянатида, уйғурларниң роза тутушиға кашила қилмаслиқни, уларниң бәхираман роза тутушиға йол қоюшни, хитай һөкүмитиниң иғвагәрчилики сәвәблик һәрқандақ тоқунуш йүз бәрсә униңға хитай һөкүмитиниң өзиниң җавабкар икәнликини оттуриға қойған.

Дуня уйғур қурултийи өз баянатида йәнә хитай һөкүмитиниң рамизан мәзгилидә “шәрқий түркистан хәлқиниң учур алақә әркинликигә йол қоюши” ни, рамизанда “йепиқ тәрбийәләш лагерлири” дики уйғурларни қоюп берип, уларниң рамизанни хатирҗәм өткүзүшигә капаләтлик қилишини, хәлқара җәмийәтниң хитайни алақидар хәлқара кишилик һоқуқ вә диний әһдинамиләргә әмәл қилишиға үндишини, уйғурлар дияриға мухбир вә тәкшүрүш хадими әвәтип, йүз бериватқан әһвалларни игилишини тәләп қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт