Уйғур районида юқумниң омумйүзлүк ямраватқанлиқи мәлум болмақта

Хитай таратқулириниң хәвиригә қариғанда, 8-авғуст күнигичә кесәллик аламити йоқ юқумниң или областидин башқа йәнә чөчәк, қәшқәр, бортала, ақсу, қомул, үрүмчи қатарлиқ 7 вилайәт (област, шәһәр) вә 12 наһийә (шәһәр, район) гә ямриғанлиқи, юқумдарларниң 274 нәпәргә йәткәнлики мәлум қилинған; бу техи биңтуәндики юқум санини өз ичигә алмайдикән.

Или областида юқумдарлар әң көп болуп, ғулҗа шәһиридә 219, ғулҗа наһийәсидә 33, нилқа наһийәсидә 4, тарбағатай вилайитиниң савән шәһиридә 2, бортала шәһиридә 2, ақсу шәһиридә 2, қомул шәһиридә 1, үрүмчи шәһиридә 4 юқумдар байқалған.

8-Авғуст күни уйғур аптоном районлуқ һөкүмәт ахбарат ишханиси юқум әһвалидин мәлумат бериш йиғини чақирған, йиғинда аптоном районлуқ сәһийә-сақлиқни сақлаш комитетиниң муавин мудири сүй йән һәр қайси җайлардики юқум әһвалиға қарап уларни “юқум хәтири еғир, оттураһал, йәңгил” дәп үч районға айриғанлиқини билдүргән. Или области, ақсу, қәшқәр вилайәтлири вә үрүмчи шәһиридики 45 район “хәтәрлик район” дәп бекитилгән; йәнә мәзкур област вә вилайәтләрдики 34 район “оттураһал район”, 9 район “йәңгил район” дәп бекитилгән.

Уйғур аптоном районлуқ парткомниң секритари ма шиңрүй йәнә кеңәйтилгән йиғин чақирип, сәһийә-сақлиқни сақлаш комитетиниң “үч районға бөлүш” хизмәт доклатини аңлиған һәмдә пүтүн районға ямраватқан бу йеңи типтики таҗисиман вирусни “илмий усул, юқири үнүм” билән бир тәрәп қилишни тәләп қилған.

Уйғур райониниң саяһәтчиликини гүлләндүрүшни тәшвиқ қиливатқан хитай һөкүмити һазир буниңға тосқунлуқ қиливатқан юқум вәзийитини қандақ контрол қилишниң койиға чүшкән. юқум вәзийити еғир дәп бекитилгән районлардики хәлқни “өйгә солап беқиш” тәдбирлири шаңхәй қатарлиқ шәһәрләрдикигә охшаш кесәллик, ачарчилиқ вә өлүмгә йол ечиши мумкинлики әндишә яратмақта икән.