Уйғур районида бир қисим йезиларниң «миллий алаһидиликкә игә йеза» дәп бекитилиши диққәт қозғиди

Мухбиримиз ирадә
2020-01-16
Елхәт
Пикир
Share
Принт

Уйғур аптоном районлуқ һөкүмәт бир қисим йезиларни «миллий алаһидиликкә игә йеза» дәп бекитиш һәққидә уқтуруш чиқарған.

«Тәңритағ тори» ниң 16-январ күни тарқатқан хәвиридә төвәндикиләр баян қилинған: «алақидар баһалаш тәлипигә бинаән. . . Дөләтлик милләтләр ишлири комитети аптоном район вә биңтуәндики 27 орунни ‹хитайдики аз санлиқ милләтләр алаһидиликигә игә йеза' қилишни бекитти.»

Хәвәрдә көрситилишичә, бу 27 йеза қарамай, тоқсун, куча, санҗи, бортала, ғулҗа, алтай қатарлиқ җайлардики 25 йезини өз ичигә алидикән. Биңтуәнгә қарашлиқ йезилардин иккиси бар икән. Хитай һөкүмитиниң немә сәвәбтин бир қисим йезиларниң миллий алаһидиликини сақлап қелишни бекиткәнлики көзәткүчиләрниң диққитини қозғиди.

Хитай һөкүмити уйғур елидә 2018-йилидин башлап «гүзәл аилә қурулуши», «һойла-арамларни тазилап, пакиз муһит яритиш» қурулуши қатарлиқларни қозғаш арқилиқ уйғурларниң әнәниви турмуш усулини өзгәртиш һәрикити елип барған. Бу һәрикәт бойичә йеза аһалилириниң һойла вә өй ичидики супа-каңлириниң чувулғанлиқи, миллийчә нусхидики нәқишләрниң елип ташлинип, униң орниға хитайчә мәснәви вә панус тақаш вә сафа вә кариват қоюшниң тәшәббус қилинғанлиқи ашкариланған иди.

Юқириқи әһвалларға қариғанда, хитай һөкүмитиниң һәрқайси наһийәләрдин пәқәт бир қанчә йезиниң миллийчә алаһидиликини саяһәт орунлири сүпитидә сақлап қелип, қалғанлирини пүтүнләй хитайчилаштурушни көзләватқанлиқи пәрәз қилинмақта.

Бу һәқтә мәхсус тәтқиқат елип барған америка индиана университетиниң дотсенти тимусий грус әпәнди әйни чағда радийомизға қилған сөзидә юқириқидәк һәрикәтләрни 2017-йиллирида башлиған «аилидә туридиған кадирлар сиясити» вә «лагер түзүми» билән бағлинишлиқ болған вә шундақла уйғур миллий кимликини суслаштуруш омумий сияситиниң бир қисми, дәп көрсәткән.

Пикирләр (0)
Share
Толуқ бәт