Tarim uniwérsitétini püttürüp “Shinjangda yiltiz tartqan” xitay oqughuchilar 55 minggha yetken

Washin'gtondin muxbirimiz jewlan teyyarlidi
2023.10.24

Xitayche “Tengritagh tori”, “Shinjang géziti” torining 23-öktebir küni chiqarghan xewirige qarighanda, tarim uniwérsitéti qurulghan 65 yildin buyan 80 mingdin köp xitay oqughuchi oqush püttürgen bolup, ulardin texminen 55 ming oqughuchi Uyghur rayonida qélishni tallighan.

Bu xewerde, jenubtiki ikki chong uniwérsitét-qeshqer uniwérsitéti bilen tarim uniwérsitétigha jenub bilen shimaldinla emes, ichkiri xitaydin, déngiz boyidiki ölke-sheherlerdinmu oqughuchi kélip oquwatqanliqi, buningdin asasliq sewebning, hazir pütkül xitayda bu rayon'gha bolghan tewelik tuyghusi we ishenchning küchiyiwatqanliqi alahide teshwiq qilin'ghan.

Xewerde körsitilishiche, xitay da'iriliri “Shinjangni yéngi yipek yolidiki iqtisad belwéghigha aylandurush” pilanigha maslishish üchün tarim uniwérsitétini ghayet zor kölemde kéngeytip quruwatqan, shara'itini alahide yaxshilawatqan bolup, xitay yashlirining bu uniwérsitétqa kélip oqushigha we yerlishishige ilham bermekte iken.

Uyghurshunas doktor runi sénbérg xitayning “Bir belwagh bir yol ma'arip gewdisi” teshebbusi we Uyghur éli ma'aripi heqqide toxtalghanda, xitay hökümitining ma'aripni yumshaq küch istratégiyesi süpitide qollinidighanliqini bildürgenidi.

Uningdin bashqa, aliy mektepni püttürgen Uyghur oqughuchilarning ishsizliq nisbiti yuqiri ehwalda, xitay oqughuchilar érishidighan xizmet pursitining köp, teminatining alahide yuqiri ikenliki melum. “Xitay xewerliri tori” ning yéqinda xewer qilishiche, xitay da'iriliri buningliq bilen qana'atlenmey, yuqiri ma'ash we parawanliq wedisi bilen ichkiridin “Ixtisasliq xadimlarni teklip qilish” ni yolgha qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.