Җумһурийәтчи палата әзалири «хәлқ гезити» ни тәкшүрүш һәққидә әрз сунди

Мухбиримиз әзиз
2020-02-12
Елхәт
Пикир
Share
Принт

Филорида шитатидики әң чоң гезитләрдин болған «флорида хәвәрлири» ниң 11-февралдики хәвиридә ейтилишичә, өткән һәптә америка кеңәш палатасиниң әзалиридин там каттин, марко рубйо қатарлиқлар америка әдлийә министирлиқиниң министири бил бар әпәндигә мәхсус имзалиқ әрз сунған.

Бирләшмә әрздә улар хитай компартийәсиниң орган гезити болған «хәлқ гезити» ниң хитай имза қойған «чәтәл агентлиқлирини тизимлаш қануни» да бекитилгән хәлқаралиқ бәлгилимиләргә хилаплиқ қилиш қилмишини тәкшүрүшни тәләп қилған.

Бирләшмә әрздә көрситилишичә, хитай һөкүмити ташқи дуняға қаритилған тәшвиқат хизмити үчүн 2009-йилиниң өзидила 7 милярд америка доллириға йеқин пул аҗратқан. Әмма мушундақ ғайәт зор мәбләғ бәдилигә хитай һөкүмитиниң чәтәлләргә қаритилған тәшвиқат васитилири явропа вә америкадики инглиз тиллиқ кишиләргә ялған вә бурмиланған учурларни йәткүзүшни асас қилған. Бу җәһәттә «хәлқ гезити» ниң өзигила йилиға 35 милйон америка доллири аҗритилған болуп, мәзкур гезит изчил бурмиланған мәлуматларни тарқитиш арқилиқ америка-хитай мунасивитигә қизиққучи ғәрб оқурмәнлирини қаймуқтуруп кәлгән.

Бирләшмә әрздә көрситилишичә, «хәлқ гезити» америкадики оттуз нәччә мустәқил хәвәр агентлиқиға, җүмлидин «вол-ситрет кочиси гезити», «вашингтон почтиси» қатарлиқларға һәқ төләп шу гезитләрни тарқатқанда төт бәттин сәккиз бәткичә болған «хитайға нәзәр» намлиқ «бала гезит» ни қошуп тарқитишни қолға кәлтүрүвалған. Шуниңдин буян ашу сәһипиләр арқилиқ хитайниң сиясий қарашлири америка ахбарат саһәсидики асасий еқим дунясиға кириватқан болуп, бу сәһипиләрдә хитай компартийәсини иҗабий қияпәттә тәсвирләйдиған мақалә вә обзорлар көпләп елан қилинған. Җүмлидин уйғур дияридики лагерлар мәсилиси, хоңкоңдики демократийә намайиши қатарлиқ ашкара болған қанунсиз қилмишларни «йоллуқ һәрикәтләр» қилип тәсвирләшкә көпләп орун берилгән.

Мәлум болушичә, «хәлқ гезити» ниң чәтәлләргә тарқитилидиған нусхиси болған «йәр шари вақти гезити» диму пат-патла уйғурлар мәсилисигә мунасивәтлик нурғун хәвәрләр һәқ-наһәқ пүтүнләй астин-үстүн қиливетилгән һалда берилип кәлгән иди. Мәзкур бирләшмә әрзгә җумһурийәтчиләр партийәсидин болған оттуз нәччә палата әзаси бирликтә имза қойған болуп, улар америка әдлийә министирлиқидин бу мәсилигә җиддий муамилә қилишни алаһидә тәләп қилған.

Пикирләр (0)
Share
Толуқ бәт