Yawropa kishilik hoquq soti maltani Uyghurlarni chégradin chiqiriwetmeslikke buyrughan

Muxbirimiz jewlan
2023.01.18

Bu yil 1-ayning 16-küni, yawropa kishilik hoquq soti maltani bu dölette yashawatqan Uyghur er-ayalni chégradin chiqiriwetmeslikke buyrughan.

“Qoghdighuchi” torining 17-yanwar küni bergen xewiridin melum bolushiche, muhajirettiki bir jüp Uyghur er-ayal 2016-yil maltagha kélip panahliq telep qilghan, emma bu iltimasi 2017-yil ret qilin'ghandin kéyin ular maltada nechche yil yoshurunup yashashqa mejbur bolghan. 2022-Yilgha kelgende ular qayta iltimas sunup, özlirini maltadin qayturuwetmeslikni telep qilghan, emma 2023-yil 1-ayning 12-küni yene ret qilin'ghan. Malta hökümiti ularning xitaygha qayturulidighanliqini, kelgüsi bir nechche kün ichide nöwetchi ayropilan éniq bolghan haman ularni yolgha sélip qoyidighanliqini bildürgen hemde ularning téléfonini éliwalghan.

Xewerde éytilishiche, bu Uyghur er-ayal maltada yashawatqan mezgilde malta hökümiti ulargha héchqandaq yardem bermigen we ular xitaygha qayturulghan teqdirde ziyankeshlikke uchraydighanliqini bilip turup, ularning iltimasini ret qilghan.

Ayning 13-küni maltadiki hökümetsiz teshkilat “Aditus fondi” (Foundation Aditus) bilen ispaniyediki hökümetsiz teshkilat “Qoghdighuchi” (SafeGuard Defenders) yawropa sotigha erz sunup, maltagha oxshash yawropa ittipaqi döletlirining kishilik hoquq kélishimige dawamliq sel qarawatqanliqi, Uyghur rayonidiki kishilik hoquq jinayiti dawam qiliwatqan hemde bu ikki panahliq tiligüchining zulumgha uchrighanliq pakitliri éniq ehwalda, ularning hoquqini qoghdimighanliqini eybligen hemde ularni xitaygha qayturmasliq kéreklikini otturigha qoyghan.

Yawropa soti 1-ayning 16-küni maltagha uqturush yollap, bu Uyghur er-ayalni xitaygha qayturmasliqqa buyrughandin kéyin aditus fondi ipade bildürüp: “Yawropa sotining bu buyruqi maltaning panahliq siyasiti we uning resmiyetlirige bérilgen bir tenqid. Ular da'im panahliqqa eng muhtaj kishilerge, yeni qebih zorawanliq we ziyankeshliktin qéchip kelgenlerge sel qaraydu” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.