Xitay hökümiti “Shinjangni medeniyet arqiliq ozuqlandurush” xizmitini dawamliq ilgiri sürmekte

Xitayche “Shinjang géziti” we “Tengritagh tori” 24-iyul küni chiqarghan xewerdin melum bolushiche, 7-ayning 24-küni “2024-Yilliq shinjangni medeniyet arqiliq ozuqlandurush xizmitini ilgiri sürüsh yighini” chaqirilghan.

Yighinda xitay kompartiyesi 20-nöwetlik 3-omumiy yighinining rohini öginish, shi jinpingning “Shinjangni medeniyet arqiliq ozuqlandurush istratégiyelik pilani” ni öginish we izchillashturush muzakire qilin'ghan hemde kélerki yérim yilliq xizmetler orunlashturulghan.

“Shinjangni medeniyet arqiliq ozuqlandurush” xitay kompartiyesi bash sékrétari shi jinping 2020-yil “3-Qétimliq shinjang xizmiti söhbet yighini” da otturigha qoyghan “Shinjangni idare qilish istratégiyesi” bolup, uningda “Medeniyet bir dölet we bir milletning rohi. Jungxu'a medeniyiti bolsa jungxu'a milletliri berpa qilghan rohiy bayliq bolup, jungxu'a milletlirining meniwi xasliqigha wekillik qilidu, shundaqla u shinjangdiki her millet medeniyitining kélish menbesi we jewhiri. U öz nöwitide shinjangdiki her millet xelqining meniwi yölenchüki, ularning qelbi mensup bolghan meniwiyet baghchisi, shundaqla ularning medeniyet tereqqiyatining heriketlendürgüch küchi” déyilgen.

Uyghur kishilik hoquq qurulushi bu heqte élan qilghan “Xitay hökümiti ‛shinjangni medeniyet arqiliq ozuqlandurush‚ siyasiti bilen mustemlikichilik we irqiy qirghinchiliqni tézleshtürmekte” namliq doklatida, shi jinping bu yerde dewatqan medeniyetning xitay tili we medeniyiti ikenlikini, “Ozuqlandurush” déginining xitaygha xas medeniyetni Uyghurlargha singdürüsh we Uyghurlarning islam étiqadini xitaychilashturush ikenlikini körsetkenidi. Bu qétimqi yighinda otturigha qoyulghan xizmet nishani bolsa xitay hökümitining bu xildiki xitaylashturush herikitining Uyghur élide téximu küchlük dawam qilidighanliqidin bésharet, dep qaralmaqta.