Shi jinpingning ürümchide qilghan sözini öginish yighinida “Ikki yüzlimichi” lerni dawamliq tüzesh tekitlendi

Washin'gtondin muxbirimiz jewlan teyyarlidi
2023.08.30

8-Ayning 26-küni, xitay kompartiyesi bash sékrétari shi jinping ürümchide Uyghur aptonom rayonluq partkom, hökümet we bingtüen kattibashlirining doklatini anglighandin kéyin, Uyghur rayonining istratégiyelik ornining alahide muhimliqini tekitlep, bu rayonda yolgha qoyup kelgen basturush siyasetlirini téximu kücheytish toghrisida yolyoruq bergenidi.

Xitayche “Tengritagh tori” , “Shinjang géziti” torining 29-awghust küni bergen xewiridin melum bolushiche, aptonom rayon boyiche “Shi jinpi'ingning sözini yetküzüsh, öginish we izchillashturush chong yighini” échilghan. Aptonom rayonluq partkom we bingtüen partkom sékrétari ma shingrüy yighinda söz qilip, “Shi jinpingning muhim sözining rohini öginish we izchillashturush rayonimizning nöwettiki we buningdin kéyinki bir mezgildiki eng chong ishimiz we eng muhim siyasiy wezipimiz” dégen.

Ma shingrüy bu yighinda shi jinpingning “Shinjangning uzun muddetlik eminlikini saqlash üchün qanun bayriqini égiz kötürüsh, qanunni qoral qilish, térrorluqqa qarshi küresh qilish bilen muqimliqni kücheytishni qanunlashturush we da'imlashturush, hemmini tégidin tüzesh, yiltizidin dawalashni kücheytish” dégen telimatini qet'iy ijra qilishni tekitlesh bilen birge, “Milliy rayondiki kadirlargha qoyulidighan 4 alahide telep boyiche kadirlar qurulmisini yaxshilash, kadirlarning kespiy sapasini östürüsh, ‛ikki yüzlimichi‚ lerni tüzesh xizmitini qanun boyiche kücheytish” qatarliqlarni otturigha qoyghan. Bu yerde “4 Alahide telep” dégini xitay kompartiyesi rehberlikini qet'iy himaye qilish, heq-naheq qarishi éniq bolush, jungxu'a milletliri ortaq éngini kücheytishte mustehkem bolush, her milletni qizghin söyüshte rastchil bolush qatarliqlar bolup, bu telepke yetmigenler layaqetsizler, yaki “Ikki yüzlimichiler” hésablinip, qanun boyiche bir terep qilinidiken.

Ilgiriki xewerlirimizdin melum bolghinidek, Uyghur kadirlirini “Ikki yüzlimichi” qalpiqi keydürüp jazalash, chén chüen'go dewride otturigha chiqqan heriket bolup, qaysi kadirni jazalash tamamen xitay emeldarlirining rayiche bolup kelgen. Hetta xitaygha eng sadiq dep qaralghan Uyghur emeldarlirimu “Ikki yüzlimichi” bolup jazalinishtin qéchip qutulalmighanidi. Ma shingrüyning bu sözni qayta tekitlishi Uyghur emeldarlirining yene bir meydan tazilash herikitige duch kélidighanliqidin bésharet béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.