Ши җинпиң москваниң бу йил 5-айдики “ғалибийәт күни” паратиға қатнишиш тәклипини қобул қилған

Хитай рәиси ши җинпиң русийәниң бу йил 5-айда өткүзүлидиған сабиқ совет иттипақиниң 2-дуня урушида натсистлар германийәсиниң үстидин ғәлибә қилиши мунасивити билән өткүзүлидиған “ғалибийәт күни” паратиға қатнишиш тәклипини қобул қилған.

Ройтерс агентлиқиниң билдүрүшичә, русийә дөләт ахбарат агентлиқи TASS дүшәнбә күни, йәни 10-феврал бәргән хәвиридә русийәниң хитайда турушлуқ баш әлчиси игор моргулоф (Igor Morgulov) ниң сөзини нәқил кәлтүрүп, “хитай рәиси ши җинпиң 9-май күни москвада өткүзүлидиған ‛улуғ вәтән уруши‚ ниң 80 йиллиқини тәбрикләшкә қатнишиш тәклипини қобул қилди” дегән.

Москваниң “ғалибийәт күни” ни тәбриклишигә илгири ғәрб дөләтлириниң рәһбәрлири қатнишип кәлгән болсиму, әмма русийәниң 2022-йили 2-айда украинаға қораллиқ таҗавуз қилишидин кейин улар бу паратқа қатнишишни тохтатқан. Һалбуки, хитай русийәни дипломатик вә иқтисадий җәһәттин изчил қоллашни давамлаштуруп кәлгән. Шималий атлантик әһди тәшкилатиниң сабиқ баш катипи җенс столтенберг өткән йили 9-айда, хитай русийәниң украинаға қозғиған таҗавузчилиқ урушини қоллаватқан “ачқучлуқ амил” ға айланғанлиқини билдүргән. Шу сәвәбтин америка русийәгә ярдәм қиливатқан бәзи хитай ширкәтлиригә ембарго йүргүзгән иди.

Ройтерс агентлиқиниң билдүрүшичә, русийә баш әлчиси игор моргулоф йәнә, ши җинпиңниңму русийә пирезиденти виладимир путинни бу йил 9-айда өткүзүлидиған хитайниң японға қарши урушиниң ғәлибисини тәбрикләшкә тәклип қилғанлиқини ейтқан. Натсистлар германийәси 1945-йили 8-май күни иттипақдаш дөләтләргә шәртсиз тәслим болған болуп, америка, фирансийә, әнглийә қатарлиқ дөләтләр шу күни “явропаниң ғалибийәт күни” қилған, әмма москва сабиқ совет иттипақи дәвридин буян 9-майни өзиниң “ғалибийәт күни” сүпитидә тәбрикләп кәлмәктә. Хитай таможна санлиқ мәлуматлириниң ашкарилишичә, хитайниң русийә билән болған 2024-йилидики импорт-експорт содиси 237 милярд долларға йетип, рекорт яратқан.