Украина уруши әвҗигә чиққан бир пәйттә ши җинпиң москваға йетип кәлди

Украина уруши әвҗигә чиққан, шундақла хәлқара җинайи ишлар сот мәһкимиси русийә президенти владимир путинниң үстидин тутуш буйруқи чиқарған бир пәйттә, хитай рәиси ши җинпиң 20-март күни русийә зияритини башлиған. Ройтерс агентлиқиниң хәвәр қилишичә, хитай рәиси ши җинпиң шу күни кремил сарийида владимир путин билән көрүшүп, һәм ғәрбкә тақабил туруштики пайдилиқ иттипақдаш, дәп қарайдиған русийә билән иқтисадий мунасивәтни чоңқурлаштурушни һәм бейҗиңниң украина тинчлиқ мусаписидики ролини алға сүрүшкә киришкән.

Ши җинпиң хәлқара җинайи ишлар сот мәһкимиси өткән җүмә күни владимир пүтүн үстидин тутуш буйруқи чиқирип, униң украинаға қораллиқ таҗавуз қилған бир йилдин артуқ вақиттин буян, украина балилирини русийәгә йөткәш билән әйиблишидин бери униң билән көрүшкән тунҗи чәтәл рәһбиридур. Мәлум болушичә, ши җинпиңниң зиярити йәнә хитай, русийәниң украина урушини қорал-ярақ билән мәхпий тәминләш билән әйиблиниватқан, униң тәминлигән қораллириниң укра‍ина уруш мәйданлирида олҗа елинғанлиқиға даир хәвәрләр тарқалған бир вақитта елип берилған.

Ши җинпиң билән пүтүн кремл сарийида учрашқанда бир-биригә “қәдирлик достум” дәп хитаб қилишқан. Ши җинпиң, владимир путинниң “күчлүк рәһбәрликидә русийәниң муһим мувәппәқийәтләргә еришкәнлики” ни, русийә хәлқиниң 2024-йилдики сайламда путинни қайта “қоллишиға ишинидиғанлиқи” ни ейтқан. Путинниң қәйт қилишичә, “хитай иқтисадни раваҗландурушта вә дөләтни күчәйтиштә интайин үнүмлүк система яратқан”.

Хитай русийә билән болған мунасивитини күчәйткән бир вақитта, украина урушини һәл қилишниң 12 маддилиқ пиланини оттуриға қойған. Лекин украина вә униң ғәрб иттипақдашлири һәрқандақ бир уруш тохтитиш русийәгә вақит яритип бериши мумкинликини, русийә билән хитайниң хәлқара қанунға әмәл қилишини, русийәниң қошун чекиндүрүшини тәләп қилған. Ройтерс агентлиқиниң билдүрүшичә, кремил сарийи путинниң ши җинпиңға русийәниң позитсийә һәққидә тәпсилий чүшәнчә беридиғанлиқини ейтқан. Хәвәрдә икки тәрәпниң 21-март күни рәсмий сөһбәт елип баридиғанлиқи билдүрүлгән.