Xitay amérikaning 28 shirkitige éksport cheklimisi qoyghan
2025.01.02
Xitay amérikaning 28 shirkitini “Dölet bixeterliki we menpe'etini qoghdash” yüzisidin éksport cheklimisi tizimlikige kirgüzgen.
“Roytérs agéntliqi” ning 2-yanwar küni bu heqte bergen xewiride éytilishiche, xitay mal éksport qilishni chekligen bu amérika shirketliri ichide hemmibab dinamikiliq küch shirkiti (GD. N), boyin shirkiti mudapi'e ishliri merkizi, alem boshluqi we xewpsizlik shirkiti, lokid martén shirkiti, rayton bashqurulidighan bomba mudapi'e shirkiti qatarliqlar bar iken. Xitay soda ministirliqining bildürüshiche, xitay 2-yanwar künidin bashlap bu shirketlerge qosh istémal buyumliri, yeni xelq istémaligha hem hem herbiy ishlargha ishletkili bolidighan istémal buyumlirini éksport qilishni chekleydiken.
“Nyu-york waqti géziti” ning 2-yanwar bu heqte bergen xewiride qeyt qilinishiche, xitay yene teywen'ge qoral sétishqa munasiwetlik bolghan 10 amérika shirkitige mal éksport qilishni chekleydiken hem ularning xitayda soda qilishini, shirket diréktorlirining xitaygha kirip-chiqishini men'i qilidiken.
Xewerde mundaq déyilgen: “Bir nechche heptidin kéyin amérikaning pirézidéntliq wezipisige olturidighan donald tramp xitaygha éghir tamozhna béji qoyidighanliqigha wede bergenidi. Démekki, xitay bu éksport cheklimisi arqiliq amérikagha qayturma zerbe bérishke teyyarlinip bolghanliqini bildürdi”.
Amérikadiki “Shirketler uchraydighan xeterni kontrol qilish merkizi” diki mutexessislerning qarishiche, xitay hökümiti ilgirimu bu shirketlerge tar da'iride bezi cheklimilerni qoyup kelgen. Emma bu shirketlerning köpinchisining xitaydiki tijaret kölimi unche chong emes iken.