Xitay taliban hakimiyitidiki afghanistan'gha bash elchi teyinligen

Xitay, taliban hakimiyitidiki afghanistan'gha resmiy bash elchi teyinlep ewetken. 13- Séntebir küni taliban da'iriliri bu xitay elchisini chong murasim bilen kütüwalghan.

El-jezirening déyishiche, xitay bash elchi jaw shéng forma kiygen eskerler teripidin kütüwélin'ghan we hemde taliban hökümitining bashliqi muhemmed hesen axund we tashqi ishlar ministiri muttaqi qatarliq talibanning yuqiri derijilik emeldarliri bilen körüshken. Bu, 2021-yili taliban hakimiyetni ötküzüwalghandin buyan, tunji qétim bir bash elchining bundaq heshemetlik halda kütüwélinishi bolup hésablinidiken.

Afghanistan tashqi ishlar ministiri amir xan muttaqi xitay elchisi jaw shéngning afghanistan'gha teyinlinishini “Muhim signal we muhim qedem” dégen.

Xewerde déyilishiche, xitay tashqi ishlar ministirliqi bu heqtiki bayanatida: “Bu xitayning afghanistanda turushluq bash elchisining normal wezipe almishishi bolup, u xitay bilen afghanistan otturisidiki söhbet we hemkarliqni dawamliq ilgiri sürüshni meqset qilidu” dégen hemde “Xitayning afghanistan'gha qaratqan siyasitining éniq we izchil” bolup kelgenlikini tekitligen.

Taliban kontrolluqidiki afghan hökümiti hazirghiche héchqandaq dölet teripidin resmiy yosunda étirap qilinmighan. Béyjing, yéngi elchi teyinleshning kéyinki künlerde taliban hökümitini resmiy étirap qilishqa qarap ilgirilep-ilgirilimeydighanliqigha hazirche éniq jawab bermigen.

Talibanning qatarda turushluq bayanatchisi suheyil shahin eljezirege qilghan sözide “Xitayning herikiti ikki dölet munasiwitini téximu kücheytip, her qaysi sahelerdiki hemkarliqqa yol achidu” dégen.

Xitay hökümiti téxi taliban hakimiyitidiki afghanistan hökümitini resmiy étirap qilmighan we diplomatik munasiwet ornatmighan bolsimu, emma afghanistan'gha toxtimay wekiller ömiki ewetip, türlük iqtisadiy kélishimlerni tüzüp, afghanistanni özige baghlashqa urunup kelmekte. Téxi bu yil 5-ayda xitay afghanistan paytexti kabul bilen Uyghur élining merkizi ürümchi arisida her charshenbe küni biwasite uchidighan hawa qatnishini resmiy yolgha qoyghanliqini jakarlighan.