Xitay bayanatchisi amérikining xitayning herbiy we bixeterlik tereqqiyati heqqidiki yilliq doklatigha naraziliq bildürdi

Xitayning tashqi ishlar bayanatchisi xu'a chünying 7 - may seyshenbe küni muxbirlarning so'aligha jawab bérip, amérika dölet mudapi'e ministirliqi teripidin 6 - may küni élan qilin'ghan doklatni“Amérika, junggoning adettiki dölet mudapi'esi qurulushi heqqide qalaymiqan yekün chiqardi” dep eyiblidi.

Besh burjeklik bina tünügün élan qilghan “Xitayning herbiy we bixeterlik tereqqiyati heqqide yilliq doklat” xitayni herbiy sélinmida ochuq - ashkara bolushqa chaqirip, “Béyjing bu yil 3 - ayda herbiy sélinmini 7.10 Pirsent köpeytip, omumi herbiy xam chotini 114 milyard dollargha chiqirish arqiliq 20 nechche yildin buyanqi izchilliqni saqlap qaldi. Halbuki, xitay ochuq - ashkara bolmighachqa, u bazar igilikige köchüshni toluq tamamlap bolmighachqa, uning heqiqiy herbiy xam chotini hésablap chiqish qiyin.” dégen hemde 2012 - yili ichide yüz bergen amérikining hökümet organliri we soda shirketlirige qilin'ghan intérnét hujumliri hemde uchur oghrilash qilmishlirida xitay hökümiti we xitay armiyisining qoli barliqini alahide eskertken idi.