Xitay tashqi ishlar ministiri wang yi "Amérikining ornini élish niyitimiz yoq" dégen

Muxbirimiz irade
2018-03-08
Élxet
Pikir
Share
Print

Xitay tashqi ishlar ministiri wang yi peyshenbe künidiki axbarat élan qilish yighinida qilghan bir sözide xitayning amérikining ornini tartiwélish xiyali yoqluqini ilgiri sürgen. U sözide "Xitayning zor tereqqiyatining amérikidiki bezi kishilerde 'xitayning amérikining ornini élish meqsiti bar' dégen chüshenche peyda qiliwatidu. Emma bu tolimu chong we istratégiyilik bir xataliq," dégen.

Wang yi, xitayning tereqqiyatining dunya üchün paydiliqliqini, amérika-xitay ikki döletning riqabetchi bolushning ornigha hemkarlashquchi bolsa bolidighanliqini we xitaydiki tereqqiyatining tinchliqperwer bir tereqqiyat ikenlikini ilgiri sürgen. 

Biraq xitay tashqi ishlar ministiri wang yi bilen oxshash bir künde yene xitayning herbiy ishlar tetqiqat akadémiyisining bashliqi général xé léy söz qilip, xitayning jenubiy déngizda mudapi'e eslihelirini orunlashturush arqiliq jenubiy déngizdiki igilik hoquqini kapaletke ige qilishi kérekliki heqqide jar salghan. 

Birleshme agéntliqining muxbirliri général xé léydin xitayning jenubiy déngizdiki sün'iy aral qurulushi we rayon'gha herbiy ayropilan yötkesh mesilisi heqqide so'al sorighanda, u jawab bérishni ret qilip, uni "Xitayning ichki ishi," dégen. 

Firansiye agéntliqining bu heqtiki xewiride gerche xitay tashqi ishlar ministiri wang yi yuqiriqidek söz qilghan bolsimu, emma xitay re'isi shi jinpingning 19-qurultayda qilghan sözide özining xitayni dunyaning merkizi döliti haligha ekilish niyiti barliqini nahayiti ochuq ipade qilghanliqini, xitayning mushu usulda öz tesirini kücheytish usulining nöwette xelq'arada endishe qozghawatqanliqini bayan qilghan.

Toluq bet