Хитай айродромларда бихәтәрлик тәдбирлирини күчәйтти

Мухбиримиз әркин
2016-03-25
Share

Хитай һөкүмити белгийә террорлуқ һуҗумға учриғандин кейин айродромларда бихәтәрлик тәдбирлирини қаттиқ күчәйткән. Хитай хәлқ һава қатнаш идариси, "бу тәдбирләр белгийәдә йүз бәргән террорлуқ һуҗум сәвәблик елинғанлиқи" ни билдүргән.

Бир айродром хадиминиң фирансийә агентлиқиға билдүрүшичә, аманлиқ тәдбири хитайдики барлиқ айродромларда күчәйтилгән. Хәвәрдә, хитай аманлиқ хадимлириниң бейҗиң, шаңхәй, чеңду қатарлиқ шәһәрләрдики айродром заллириниң сиртида бәзи йолучиларни тохтитип, сомка, йүк-тақилирини тәкшүрүватқанлиқини билдүргән.

Д у қ илгири хәлқара яки хитайда йүз бәргән һәр қетимлиқ зор вәқәдә уйғурлар хитай аманлиқ хадимлириниң нуқтилиқ тәкшүрүш нишаниға айлинип қалидиғанлиқини тәнқидләп кәлгән иди.

Фирансийә агентлиқиниң хәвиридә, тәкшүрүш нишани уйғурларға қаритилғанлиқини тилға алмиған. Әмма "йеқинқи йиллардин буян мусулман уйғурларниң вәтини шинҗаңда зораванлиқ вәқәлириниң күчийип кәткәнлики" ни әскәрткән.

Хәвәрдә йәнә, хитай һөкүмити зораванлиқ вәқәлирини исламчи террорчиларға артсиму, әмма кишилик һоқуқ тәшкилатлириниң бу вәқәләрни кәмситиш, уйғур диний вә мәдәнийитини контрол қилиш кәлтүрүп чиқарған, дәп қарайдиғанлиқини алаһидә тәкитлигән.

Хитай һөкүмити өткән йили 11‏-айда парижда йүз бәргән террорлуқ һуҗумини буниңдин 2 ай аввал ақсу соған көмүр кенида йүз бәргән һуҗумға бағлап чүшәндүрүшкә урунған болсиму, әмма бу фирансийәлик журналист урсула готийирниң рәддийәсигә учриған иди.

Чаршәнбә күни бирюсселда йүз бәргән террорлуқ һуҗумда 31 адәм өлтүрүлгән. Һуҗумни ирақ вә сүрийәдики террорлуқ гуруһ - "даиш" өзиниң елип барғанлиқини елан қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт