Közetküchiler: “Xitay dominika jumhuriyitini 3 milyard dollargha sétiwalghan”

Muxbirimiz erkin
2018.05.01

Teywen xitayning dominika jumhuriyitige para bérip, uning teywen bilen bolghan diplomatik munasiwitini üzdürgenlikini ilgiri sürdi. Roytérs agéntliqining xewer qilishiche, teywen tashqi ishlar ministiri wu chichong xitayning dominika jumhuriyitige teywen bilen diplomatik munasiwitini üzse, uninggha 3 milyard 100 milyon dollar meblegh sélish we qerz bérishke wede qilghanliqini bildürgen. Dominika jumhuriyiti seyshenbe küni teywen bilen bolghan uzun yilliq diplomatik munasiwitini üzüp, xitay bilen diplomatik munasiwet ornatqanliqini jakarlighan idi. Wu chichong seyshenbe küni xitayning dollar diplomatiyesini ishqa sélip, teywenning diplomatik munasiwitige buzghunchiliq qilghanliqini bildürgen. U, “Teywen xitayning dollar diplomatiyesini ishqa sélip, teywenning diplomatik ittipaqdashlirini uningdin yüz örügüzüshtek terbiyesiz qararini qattiq tenqid qilidu” dégen.

Roytérsning xewiride körsitishiche, xitay tash yol qurulushigha 400 milyon dollar, ul esliheler qurulushigha we bir gaz éléktr istansisigha 300 milyon dollar qerz pul bérishke wede bergen. Lékin yéqinda xelq'ara pul-mu'amile sahesidiki bezi nopuzluq erbablar bu döletlerning qerz qayturush iqtidari yoqluqini agahlandurup, ularning igilik hoquqidin ayrilip qélishi mumkinlikini tekitligen idi.

Teywenning ottura amérika we tinch okyandiki béliz, nawru qatarliq dölet bilen diplomatik munasiwiti bar bolup, xitay bu döletlerni qerz pul bérish, meblegh sélish dégendek wediler bilen özige tartip kelgen. Teywen tashqi ishlar ministiri wu chichong seyshenbe küni yene dominika jumhuriyitining prézidénti danilo medinani tenqidlep, uni “Xitayning meblegh sélish, yardem bérish heqqidiki saxta wedisige ishinip kétish” bilen eyibligen. Roytérs agéntliqining bildürüshiche, xitay tashqi ishlar ministirliqi xitayning dominika jumhuriyitige iqtisadi wede bergenlikini ret qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.