Uyghur aptonom rayonining mu'awin bash teptishi xiyanetchilikke chétilip tekshürülüshke bashlighan

Xitayning xiyanetlikke qarshi turush orgini Uyghur aptonom rayonining mu'awin bash teptishi li shawlinning “Intizamgha xilapliq qilish” bilen eyiblinip tekshürülüshke bashlighanliqini élan qildi.

Xitay merkizi intizam tekshürüsh komitéti we réwiziye ministirliqining ashkarilishiche, Uyghur aptonom rayonluq yuqiri teptish mehkimisining mu'awin bash teptishi, teptish mehkimisi partkomining da'imiy ezasi li shawlin “Intimzagha éghir xilapliq qilish” seweblik tekshürülüshke bashlighan.

Xewerde, li shawlinning konkrét qandaq intizamgha éghir xilapliq qilghanliqi tilgha élinmighan bolsimu, emma da'iriler köp hallarda bu xil eyibleshni asasen xiyanetchi emeldarlargha qollinidu. Xitay axbarat wasitiliridin “Xelq tori‏‏”ning ashkarilishiche, li shawlin 1959‏-yili shenshining wéynen nahiyiside tughulghan.

U uzun mezgil Uyghur rayonining edliye sistémisida bolupmu Uyghur-xitay munasiwiti eng sezgür rayonlarning biri, qeshqerde ishligen. Li shawlin Uyghur rayonida yéqinqi bir yil ichide xiyanetchilik bilen eyiblinip qolgha élin'ghan yaki tekshürülüshke bashlighan az sandiki yuqiri derijilik emeldarlarning biri.

Xitay hökümiti Uyghur rayonida xiyanetchilik, parixorluqqa zerbe bériwatqanliqini ilgiri sürsimu, emma Uyghur pa'aliyetchiler kompartiyening Uyghur rayonida muqimliqni, dep emeldarlarning parixorluq, xiyanetchilik herikitige köz yumuwatqanliqini, buning rayonda kishilik hoquq buzghunchiliqini éghirlashturuwatqanliqini tekitlep keldi.