Kaliforniyede 100 dek öyni epyün étizigha aylanduruwalghan xitay jinayet guruhi tarmar qilin'ghan

Muxbirimiz irade
2018-04-05
Élxet
Pikir
Share
Print

Amérikining kaliforniye shtatliq saqchi da'iriliri charshenbe küni shimaliy kaliforniye rayonida 100 dek öy sétiwélip, uni qanunsiz halda epyün östüridighan we ishlepchiqiridighan jaygha aylanduruwalghan bir xitay jinayet guruhini pash qilghan.

"Démokratik axbarat" gézitining xewer qilishiche, shimaliy kaliforniye shtatidiki bu öyler gerche amérikida qanunluq turuwatqan xitaylar teripidin sétiwélin'ghan bolsimu, emma ular öy sétiwalghanda ishletken pullirining hemmisi xitayning fujyen ölkisidin ewetilgen iken. Öy sétiwalghuchi xitaylar amérikining nyu-york, jorjiye, oxayyo, pinsilwaniye qatarliq shtatliridin kaliforniyege yighilghan hemde bu öylerde térilghan we pishshiqlap ishlen'gen epyünlerni yene yuqiriqi shtatlargha yötkigen.

Amérika fédiral saqchi da'irilirining muxbirlargha ashkarilishiche, yuqiriqi öylerning xuddi bir kesipleshken "Yéza-igilik sana'iti" étizlirigha aylandurulghanliqini, bundaq kölimi zor qanunsiz epyün östürüsh hadisisining amérika tarixida körülüp baqmighanliqini bildürgen.

Nöwette saqchi da'iriliri kaliforniyedin öy sétiwalghan bu xitaylarning xitaydiki jinayet guruhliri teripidin mexsus halda amérikigha öy sétiwélip jinayet guruhlirigha ishlesh üchün ewetilgen yaki ewetilmigenlikini tekshürmektiken.

Melum bolushiche, xitaylar sétiwalghan kaliforniyediki 100 dek öyge élip bérilghan axturush opératsiyesige alahide heriket etritini öz ichige alghan 500 neper saqchi we ofitsér qatnashqan. Ular ikki künde 75 öyge bésip kirip axturush jeryanida 36 ming epyün chéchiki, 115 kilogram pishshiqlap ishlen'gen epyün, 68 ming dollar neq pul, 15 dane qoral we générator qatarliqlarni qolgha chüshürgen.

Toluq bet