Xitay “Értish-jungghariye yer asti su tonéli” ning qurulush sür'itini tézletken

Washin'gtondin muxbirimiz erkin teyyarlidi
2024.06.14

Xitay da'iriliri yéqindin buyan Uyghur diyaridiki chong su-insha'at qurulush türlirining biri bolghan értish deryasining yuqiri éqimidiki altay taghlirining qar süyini yer asti tonél arqiliq jungghariyege bashlash qurulushining sür'itini tézletken. Muhajirettiki Uyghur teshkilatlirining endishisini qozghighan bu qurulush, 2021-yilidin béri altay taghliridin kelgen yer asti su bek chong, su bésimining bek küchlük bolushi sewebidin nurghun kashiligha uchrap, qurulushning pütüsh waqti kéchikkenidi. Xitay taratqulirining eyni waqittiki xewerliride, 1000 kilométirliq bu yer asti su tonéli, altay taghlirining qar süyini jungghar oymanliqigha bashlisa, bu rayonning déhqanchiliq we sana'et ishlepchiqirishida zor özgirish peyda qilidighanliqi, téximu köp nopusning yashishigha imkaniyet yaritidighanliqi ilgiri sürülgen.

Xongkongdiki “Jenubiy xitay etigenlik pochtisi” gézitining xewer qilishiche, nöwette da'iriler yer asti su tonéli qurulushidiki qistangchiliq we bashqa kashililarni bir terep qilip, qurulush sür'itini tézlitish üchün sün'iy eqil téxnikisi qollanmaqtiken. Xewerde, sün'iy eqil mashinilirining bu qurulushni qayta janlandurghanliqi, bu téxnikining rayondiki yer asti qurulushlarni tézlitishte keng qolliniliwatqanliqini qeyt qilinmaqta. “Értish-jungghariye yer asti su tonéli” qurulushi, gherb döletlirining rayonda dawamlishiwatqan “Irqiy qirghinchiliq” ni toxtitish, mejburiy emgekni bikar qilish bésimlirigha  qarimay, béyjing hökümiti Uyghur diyarigha meblegh sélishni téximu köpeytip, ishlepchiqirish bazilirini, bolupmu yéngi énérgiye matériyallirini ishlepchiqirishni téximu kéngeytiwatqan bir waqitta qayta tézlitilgen. Melum bolushiche, xitayning értish deryasigha téximu köp tayinishi, rusiye bilen qazaqistanni bi'aram qilsimu, biraq hazirche ular  buni körmeske sélip, diqqitini xitay bilen bulghan bashqa sahelerdiki hemkarliqqa merkezleshtürüp kelmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.