Xitayning dunya intérnét qurultiyi mezgilide 20 pa'aliyetchi we erzdar tutqun qilin'ghan

Xitayning wujén shehiride chaqirilghan 2‏-nöwetlik dunya intérnét qurultiyi 18‏-dékabir axirlashti. Emma chet'eldiki xitay tor béketlirining ashkarilishiche, da'iriler 2 künlük qurultay mezgilide wujén shehirige erzge mangghan 20 neper shangxeylik pa'aliyetchi we erzdarni yolda tutqun qilghan, qolgha alghan we nezerbend qilghan.

Xitay “Kishilik hoquq qoghdash tori”ning jüme küni bergen xewiridin qarighanda, da'iriler jyang lingdi, jén jingfang, shu yüying qatarliq 8 kishini jinayi jawabkarliqqa tartip tutqun qilghan.

Jang jawfa, jang guylen, xung shyenxu'a qatarliq 4 kishige memuriy tutup turush jazasi bergen. Ularning ichidiki jang guylen qatarliq 3 kishini jyashing poyiz istansisida tutup qalghan.

Xitay “Kishilik hoquq tori” ning xewiride yene, sey shyawméy, xen sufang, lyu gofang, ding déyüen qatarliq 12 kishining héchqandaq qanuni resmiyetsiz tutqun qilin'ghanliqini ilgiri sürgen.

Xitay hökümiti 2‏-nöwetlik wujén dunya intérnét qurultiyi mezgilide wujén shehirining bixeterlik tedbirlirini qattiq kücheytken. Yighin merkizi jaylashqan rayondiki barliq méhmanxana, xizmet orni, dukanlarni taqap, ammiwi qatnashni toxtatqan idi.