Бейҗиңда әйдиз вируси юқумдарлири намайиш қилип һөкүмәткә наразилиқ билдүрди

Алаһазәл бирәр йүздин артуқ әйдиз вируси юқумдари чаршәнбә күни бейҗиң ваңфуҗинда йиғилиш өткүзүп хитай һөкүмитиниң әйдиз сиясити вә җәмийәтниң кәмситишигә наразилиқ билдүргән. Һөкүмәтниң өзлиригә төләм төлишини тәләп қилған.

Намайишчилар сәйшәнбә күни хитай сәһийә министирлиқиниң алдида омуми хор ейтип намайиш қилған иди. Бу вәқә дәрһал чәтәл ахбарати, хитай җәмийити вә һөкүмитиниң диққитини қозғиған.

Хитайдики әйдиз юқумдарлириниң һоқуқини қоғдаш органлиридин бейҗиң әйҗишиң тәтқиқат орниниң билдүрүшичә, даириләр дәрһал сақчи күчлирини йөткәп келип, чаршәнбә күни ваңфуҗиңда топланған намайишчиларни тарқитивәткән.

Бу җәрянда сақчилар бир қисим әйдиз намайишчилирини тутуп, сақчи аптомобилиға селип елип кәткән болсиму, бирақ хәлқ ишлар министирлиқиниң әтрапиға елип берип қоюп бәргән.

Намайишчилар чаршәнбә күни ваңфуҗиңда йиғилиштин бурун хитай хәлқ ишлар министирлиқиниң алдида йиғилиш өткүзгән. Мәзкур вәқә 1-декабир йетип келидиған дуня әйдиз күни һарписида йүз бәргән иди. Намайишчилар йәнә йәрлик даириләрниң хитай мәркизи һөкүмити чиқарған 26‏-номурлуқ һөҗҗәтни иҗра қилишини тәләп қилған.

26‏-Номурлуқ һөҗҗәттә, йәрлик һөкүмәтләргә әйдиз бимарлириға һәр айда 600 сом ярдәм пули бериш, ата-аниси әйдиздә өлгән балиларниң турмушиға капаләтлик қилиш буйрулған.

Хитай даирилири икки йил аввал хитай бойичә 780 миң адәмниң әйдиз вирусидин юқумланғанлиқини елан қилған иди. Бирақ, хитай һәрбий дохтурханисиниң сабиқ дохтури гав явҗйениң илгири сүрүшичә, хитайда 10 милйонға йеқин адәм әйдиз вирусидин юқумланған.