Xitayning intérnét guruhi wekilliri ömiki “Shinjanggha yardem bérish” wedisini bildürdi
2024.08.14
Xitayning tor taratquliri we tor sodisida yétekchi orunda turuwatqan soxu, eychiyi, jingdung, méytu'en qatarliq shirket guruhlirining wekilliri 13-awghust Uyghur élige “Qizil makan shinjang sayahiti” üchün kelgen. Ma shingrüy, erkin tuniyaz qatarliqlar ularni kütüwélip, söhbet ötküzgen.
Xitayning “Tengritagh tori”, “Shinjang géziti” tori chiqarghan bu xewerde, ma shingrüyning wekillerge sözligen sözining qisqiche mezmuni bérilgen. Ma shingrüy ulargha shi jinpingning sözini neqil keltürüp, “Shinjangning pütün memlikettiki istratégiyelik orni intayin muhim. Shunga silermu shinjangning muqimliqini saqlashqa, uning yuqiri süpetlik tereqqiyatini ilgiri sürüshke we her millet xelqige xitay medeniyitini singdürüshke yardem béringlar” dégen nuqtini tekitligen.
Ma shingrüy nöwette tor dunyasining teshwiqat we soda jehettiki tengdashsiz küchini, uning kelgüside Uyghur élidiki tereqqiyatni ilgiri sürüshte oynaydighan rolini mu'eyyenleshtürüsh bilen birge, xitaydiki chong intérnét shirketlirining Uyghur élidimu öz kespini tereqqiy qildurushini, “Sherqte soqqan chotni gherbte emeliyleshtürüsh, shinjangni medeniyet arqiliq ozuqlandurush, shinjangning ésil mehsulatlirini dunyagha yüzlendürüsh, shinjang sayahetchilikini güllendürüsh, shinjang hékayisini yaxshi sözlesh” üchün hesse qoshushini ümid qilidighanliqini bildürgen.
Tor shirkiti guruhi wekillirimu uzundin buyan Uyghur élige meblegh sélishni köpeytkenlikini, ortaq menpe'et we öz'ara hemkarliq asasida bu rayondiki tor sodisi we “Medeniyet tereqqiyati” ni dawamliq ilgiri süridighanliqini bildürüshken.
Melum bolushiche, intérnét barliqqa kelgendin buyan, xitay shimaliy koréye, iran qatarliq döletlerge oxshash öz puqralirigha tor cheklimisi qoyup kelgen döletlerdin biri bolup kelgen. Xitayda hazir texminen 710 milyon kishi tordin paydilinidiken, xitay 2016-yilila “Tor bixeterlik qanuni” ni élan qilghan bolup, Uyghur élide VPN türidiki tamdin atlash eplirini ishletkenlerni “2-Derijilik térrorluq” jinayiti bilen eyibligenliki, hetta xitay shirketliri chiqarghan “Kuaiya” (ku'eyya) ep détalini ishletkenlerni tutup türme-lagérlargha solighanliqi radiyomiz teripidin éniqlan'ghanidi. Xitayning yene 2017-yildin bashlap Uyghurlarni keng kölemlik tutushta ishletken “Bir tutash bashqurush supisi” gha xitaydiki chong tor shirketlirining téxnika jehette yardem bergenliki melum.