Amérika prézidénti xitayni “Iqtisadiy tajawuzchi” dep eyibleydiken

Muxbirimiz jüme
2017.12.17

Amérika prézidénti kéler hepte élan qilidighan istratégiye höjjitide xitayni “Iqtisadiy tajawuzchi” dep eyibleydiken.

Yaponiyedin chiqidighan “Iqtisad waqit géziti” ning bu ishtin xewerdar kishilerning éytqanliridin neqil élip xewer qilishiche, prézidént tramp kéler düshenbe küni özining dölet xewpsizlik istratégiyisini élan qilin'ghanda amérikining xitaygha bolghan meydanini otturigha qoyidiken.

Amérikining dölet xewpsizlik istratégiyisi höjjiti sabiq prézidént ronald régan dewridin bashlap her nöwetlik prézidént élan qilip kéliwatqan resmiy höjjet. Buningda amérika hökümiti endishe qilidighan xewpsizlik mesililiri sherhlinidu we buning hel qilinish chariliri otturigha qoyulidu.

Bu höjjettin xewerdar bir nechche kishi prézidént trampning xitaygha ilgiriki hökümetlerge qarighanda téximu qattiq pozitsiyede bolidighanliqini bildürgen.

Xewerde neqil qilishiche, bu höjjettin xewerdar bir kishi mundaq dégen: “Bu dölet xewpsizlik istratégiyisi xitayni her jehettin bir riqabetchi, dep sherhleydu. Peqet bir riqabetchila emes, belki bir tehdit, dep. Shunga bu nöwetlik hökmettiki köpinche xadimlar xitayni bir düshmen, dep tonuydu.”

Xewerge qarighanda, ötken bir nechche aydin buyan prézidént tramp xitay bilen bolghan sodida amérika terepte körülidighan qizil reqem mesilisining körünerlik hel bolmighanliqidin barghanche jile bolushqa bashlighan. 

Xewerde neqil qilishiche, bu istratégiye höjjitini nazaret qilghan amérika dölet xewpsizlik meslihetchisi hérbért raymond mékmastér bu hepte xitay we rusiyeni “Xelq'ara tertipning ulini kolaydighan”, “Réwizi'onist döletler” dep atighan.

Xewerde körsitishiche, prézidént tramp düshenbe küni élan qilidighan dölet xewpsizlik istratégiye höjjitige xitaygha qarita qattiq ibarilerning kirgüzülüshi kéler yilida amérika-xitay munasiwetliride téximu köp dawalghushlarning bolidighanliqidin dérek béridiken. 

Prézidént tramp saylam riqabiti mezgilide, xitayni “Iqtisadiy düshmen”, dep atighan we eger prézidént bolup saylinip qalsa xitaygha qarita qattiq iqtisadiy siyaset yürgüzidighanliqni bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.