Иран май парахоти хитай парахоти билән соқушуп кәтти

Мухбиримиз үмидвар
2018-01-07
Елхәт
Пикир
Share
Принт

Иранда һөкүмәткә қарши наразилиқ намайишлири давамлишиватқан, хәлқара җәмийәт бу мәсилигә йеқиндин көңүл бөлүватқанда 7-январ, йәни йәкшәнбә күни иранниң бир май парахоти билән бир хитай йүк парахотиниң соқушуп кетиш вәқәси йүз берип, хәлқара мәтбуатларниң диққитини җәлп қилди.

«Вашингтон почтиси» гезитиниң хәвәр қилишичә, узунлуқи 274 метир келидиған панамада тизимланған, әмма иранниң «дөләтлик май парахоти ширкити» гә мәнсуп «санчи» намлиқ чоң май парахоти 136 миң тонна нефит қачилап, җәнуби корейә тәрәпкә қарап маңған болуп, хитайниң чаңҗаң дәрясиниң шәрқидики деңизға қуюлуш еғизидин 257 километир нерида хоңкоңда тизимланған «CF CRYSTAL» намлиқ йүк парахот билән соқушуп кетип, иран май парахотиға от кәткән, вәқәдә 30 иранлиқ, 2 бенгаллиқ парахот хадиминиң мәркәз билән алақиси үзүлгән. Хитай йүк парахотиниң узунлуқи 225 метир болуп, америкидин 64 миң тонна ашлиқ қачилап, гуаңдуңға қарап кетип барған икән. Парахотта 21 хитай пуқраси бар болуп, улар хәтәргә йолуқмиған вә хитай парахотиму қисмән бузулған. 

Хәвәрдә қәйт қилинишичә, «санчи» намлиқ парахот давамлиқ шиддәтлик от қалған ичидә болуп, парахот билән қуруқлуқ арисидики алақә үзүлгән, қутқузуш хадимлири қутулдуруш ишлири елип барған, җәнубий корейә тәрәп айропилан вә парахот чиқирип қутулдуруш ишлири елип бармақта. Иран тәрәп өзлириниң парахот билән алақиси болмайватқанлиқи, һазирчә парахоттикиләрниң һәммиси қазаға учриди дейишкә балдурлуқини билдүргән. 

Хитай тәрәп бу вәқәниң сәвәбини ениқлайдиғанлиқини билдүргән.

Пикирләр (0)
Share
Толуқ бәт