Хитайниң америкадики җасуслуқ паалийити вә чегра һалқиған бастуруши техиму күчәйгән

Америка авам палатасиниң елан қилған әң йеңи доклатида көрситишичә, хитайниң америкадики җасуслуқ паалийити вә өктичиләрни нишан қилған чегра һалқиған бастуруши давамлиқ күчәйгән. Доклатта, бу делоларниң бейҗиңға назук һәрбий учурларни йәткүзүш, сода мәхпийәтликини оғрилаш, хитай өктичилиригә паракәндичилик қилиш, адаләткә тосқунлуқ қилиш қилмишларға четилғанлиқи қәйт қилинмақта.

Америка авам палатаси ана вәтән хәвпсизлики комитетиниң террорлуқ, қанун иҗраати вә истихбарат төвән комитети тәрипидин елан қилинған доклатта билдүрүшичә, америка федератсийә даирилири 2021-йили 1-айдин бу йил 10-айғичә болған арилиқта, американиң 20 иштатидики хитайға мунасивәтлик җасуслуқ вәқәлиридин 55 делони бир тәрәп қилған.

Доклатта мундақ дейилгән: “хитай һөкүмити вә хитай компартийәси американиң иқтисадий бихәтәрлики, ана вәтән хәвпсизлики вә демократик қиммәт өлчимигә җиддий тәһдит салмақта. Хитай пуқралири вә хитай пуқраси болмиған, әмма хитай хәлқ җумһурийитигә ишләйдиған шәхсләрниң һәр хил җасуслуқ һәрикәтлири, җүмлидин һөкүмәт, һәрбий вә иқтисадий җасуслуқни өз ичигә алған, әмма буниң билән чәклинип қалмайдиған җасуслуқ һәрикәтлири пүтүн мәмликәт миқясида тез кеңәймәктә.”

Доклатта қәйт қилинишичә, 2000-йилидин 2023-йилғичә болған арилиқта, хитайниң америкаға қарши 224 җасуслуқ вәқәси байқалған болуп, буниң 80 пирсәнти хитайға пайдилиқ иқтисадий җасуслуқ делоси икән. Доклатта, буниң 60 пирсәнтиниң хитай җасуслири тәрипидин елип берилған сода мәхпийәтликини оғрилашқа четишлиқ җасуслуқ һәрикәтлири икәнлики билдүрүлмәктә. Доклатта, хитайниң америкадин оғрилиған әқлий мүлүк соммисиниң қиммити милярдлиған долларға йетидиғанлиқи, буниң һәр бир америка аилисигә елип келидиған иқтисадий йүкиниң 4 миң доллардин 6 миң долларға қәдәр болидиғанлиқи көрситилгән. Доклатта йәнә хитайниң чегра һалқиған бастуруши һәққидә тохтилип, хитай һөкүмити чегра сиртидики өктичиләрни йошурун яки ашкара бастурушниң әң чоң мәнбәси икәнлики тәкитләнгән.