Америка дөләт мудапиә министири хитайни җәнубий деңизда ясаватқан сүний арал қурулушини тохтитишқа чақирди

30 - Май америка дөләт мудапиә министири аштон картер баян елан қилип, хитайни җәнубий деңизда ясаватқан сүний арал қурулушини дәрһал тохтитишқа чақирди.

Картер америкиниң юқири мәйданини сингапорда ечиливатқан бир хәлқара хәвпсизлик йиғинда оттуриға қойди. Мәзкур йиғин зали асия тинч окян әллири рәһбәрлири, дипломатлар в һәрбий әмәлдарлар билән лиқ толған иди.

Катер мундақ деди: җәнубий деңиздики земин игиләш қәдими вә көлими америка қошма штатлирини чоңқур әндишигә салди.

У, аралниң илгириләп һәрбийләштүрүлүши вә йошурун һәрикәтләрниң бу йәрдә земин талиши қиливатқан әлләр арисида тоқунуш кәлтүрүп чиқириши мумкинликини тәкитлиди.

У йәнә мундақ деди: бу йәрдә бир дөләт башқа дөләтләргә қариғанда техиму ичкириләп кирди вә тиз қәдәм алди. У болсиму хитай. Һазир хитай 2 миң гектар земин игилиди. Бу әтраптики қошна дөләтләрниң игидарчилиқидики барлиқ деңиз тәвәликидинму көп. Бу тарихтин буян көрүлүп бақмиған. Хитай буни пәқәт өткән 18 ай ичидә қилди.

Йиғин мәйданидики хитай һәрбий әмәлдарлири картерниң позитсийәсигә “асассиз вә пайдисиз” етиразлиқ билдүрди.

Өткән һәптә америкиниң көзитиш айропиланлири хитай спрател араллири гурупписи әтрапиға ясаватқан сүний арал үстидин учуп өткәндә хитай америка айропиланлирини агаһландурған вә уларниң бу даиридин дәрһал чиқип кетишини тәләп қилған.

Өткән һәптә америка CNN хәвәрләр ториниң зияритини қобул қилған CIA ниң сабиқ муавин директори майкил морел җәнубий деңиздики хитай ясаватқан сүний аралниң америка - хитай арисида һәрбий тоқунуш кәлтүрүп чиқириши мумкинликини илгири сүргән.