Нөвәттә 76 миң хитай кадири уйғур аптоном районидики кәнтләрдә вәзипә өтимәктә икән

Мухбиримиз әркин
2020-06-15
Елхәт
Пикир
Share
Принт

Нөвәттә уйғур аптоном районида 76 миң хитай кадири кәнтләргә чүшүрүлүп, «намратлиқтин қутқузушқа ярдәм бериш» намида вәзипә өтимәктә икән.

«Шинҗаң гезити» ниң ашкарилишичә, 72 миң кадир райондики 12 миңдин артуқ кәнткә тарқалған икән. Мәзкур гезитниң 13-июндики хәвиридә бу кадирларниң «намратлиқтин қутқузушниң биринчи сепидә туруп, өзлириниң намратлиқтин қутқузуш вәдисини ишқа ашуруватқанлиқи» тәкитләнгән. Лекин кишилик һоқуқ тәшкилатлириниң қаришичә, уларниң вәзиписи намратлиқтин қутқузушқа ярдәм бериш дейилсиму, әмәлийәттә уларниң асаслиқ вәзиписи уйғур аилилирини назарәт қилип, уларниң «әсәбийлик» дәп қаралған диний, миллий хаһишлирини контрол қилиш, бу аилиләрдики әмгәк күчлирини районниң ичи-сиртиға пиланлиқ вә тәшкиллик йөткәш икән.

Бу һәқтики йеқинқи хәвәрләрдә бу хизмәт әтрәтлириниң йәнә уйғур деһқанлириға йеңи бир хил турмуш усулини тәвсийә қиливатқанлиқи, уларға «3 районни айриш» намида өй безәкчилик, өй вә бағ-варанлар бирләшкән әнәниви аилә муһитини өзгәртип, биңтуәндики хитай деһқанлириниң яшаш усулини теңиватқанлиқи илгири сүрүлгән. «Шинҗаң гезити» ниң хәвиридә хизмәт әтрәтлириниң йеқинқи 3 йил ичидә өзи турушлуқ кәнтләрниң қияпитидә зор өзгириш ясиғанлиқи, нурғун кәнтләрниң намратлиқ қалпиқини ташлиғанлиқини илгири сүргән.

Хәвәрдә тәкитлишичә, уйғур аптоном районлуқ қатнаш назаритиниң керийә наһийәсидики бостан ериқ кәнтигә чүшкән хизмәт әтритиниң әзаси, кәнт партийә ячейкисиниң секретари пу чүәнвен 3 йилниң алдида бу кәнтниң йоллири әгри-тоқай, өйлириниң бәк начарлиқини тәкитләп: «қисқиғинә 3 йилда кәнтниң қияпитидә ғайәт зор өзгириш болди,» дегән. Лекин у бу 3 йилда 3 милйондәк уйғурниң лагерларға қамилип, нурғун аилиләрниң вәйран болғанлиқи, нурғун уйғур йеза-кәнтлириниң қуруғдилинип қалғанлиқини тилға алмиған.

Пикирләр (0)
Share
Толуқ бәт