Xitay kaméraliri bélgiye herbiy insititutlirini közitishke ishlitilgen

Bélgiyede neshr qilinidighan “Kechqurun” (Le Soir) gézitining 25-yanwardiki obzor maqalisida körsitilishiche, bélgiye hökümiti xitaydin sétiwalghan 30 nechche közitish kamérasi bélgiye herbiy qisimlirining ishlitishige ajritip bérilgen bolup, yéqinda buning jasusluqqa ishlitilgen bolush éhtimalliqi heqqide ghulghula qozghalghan.

Obzorda körsitilishiche, bélgiye dölet mudapi'e ministiri ludiwin défondér bu heqtiki so'allargha jawab bérip “Xitaydiki ‛daxu'a‚ we ‛xikwizhin‚ (Hikvision) shirketliri yasighan kaméralarni ministirlikimiz sétiwalghan hemde herbiy qisimlargha teqsimlep bergen” dégen. Emma aptorning qarishiche, buningdiki bir muhim amil bu shirketler yasighan közitish kaméralirining Uyghur diyaridiki nazaret méxanizimigha we qirghinchiliqqa biwaste xizmet qilghanliqi iken. Yene kélip bu xil qirghinchiliqqa biwaste yardemleshken bir shirketning towarlirini sétiwélish zadila exlaqiy mizanlargha uyghun kelmeydiken.

“Xitay heqqidiki xelq'ara parlaméntlar birleshmisi” bu heqtiki ehwallarni öz tor bétide hembehirligen hemde xitay hökümitining bu xildiki chégra halqighan jasusluq qilmishlirining tunji qétimliq ish emeslikini alahide tekitligen.

Bu heqtiki munasiwetlik xewerlerde xitayning nöwette dunyadiki eng chong xelq'araliq jasusluq merkizi ikenliki alahide yer alghan bolup, ularning singip kirish hemde yuquri pen-téxnika wastiliri arqiliq jasusluq qilish qilmishliri yawropa teweside birnechche qétim pash bolghan iken. Bu qétim bélgiye herbiy sahesining xitaydin sétiwalghan közitish kaméraliri ular üchün qandaq yoshurun xéyim-xeterlerge ige ikenliki nöwette köplep muhakime qilinmaqta iken.