Xitay hökümiti tajsiman wirusi tüpeylidin ölüshning ölchimini élan qildi
2022.12.20
Xitay hökümiti bashqurushidiki “Xitay xewer tori” ning 20-dékabirdiki xewiride éytilishiche, béyjing uniwérsitéti qarmiqidiki birinchi doxturxanining mes'ulliridin wang guychyang shu küni muxbirlarni kütüwélish yighinida söz qilip tajsiman wirusi bilen yuqumlinip ölüshtiki ölchemler heqqide melumat bergen.
Xewerde éytilishiche, wang guychyang “Klinikiliq nuqtidin alghanda nöwettiki omkron baktériyesidin zeherlen'gendin kéyin yüz béridighan ölümning asasliq sewebi tüpki késelliklerdur. Wirustin zeherlinish tüpeylidin nepes siqilip ölüp kétidighanlar bekmu az” dégen. Wang guychyangning tonushturushiche, döletlik sehiye tarmaqliri yéqinda mutexessislerni ishqa sélish arqiliq bu heqtiki ölchemler toghrisida uqturush teyyarlighan. Buningda tajsiman wirusi bilen yuqumlinishtin kélip chiqqan öpke yallughi we nepes yoli qisilish hadisisi ölümge seweb bolghan bolsa buni tajsiman wirusi bilen yuqumlinip ölgen, dep höküm chiqirish, emma wirus bilen yuqumlan'ghandin kéyin bimar bashqa késellikler we esli késellikler tüpeylidin ölüp ketse buni tajsiman wirusidin kélip chiqqan ölüm emes, dep békitish belgilen'gen.
Bu yéngi ölchem boyiche bolghanda xitayda yamrashqa bashlighan tajsiman wirusida ölgen kishilerning köp qismi “Bashqa késellikler tüpeylidin ölüp ketken” dep ayrilidighan bolup, buning kelgüsidiki wirus yuqumida ölgen kishiler sanini az körsitish urunushi ikenliki texmin qilinmaqta. Emma bu xitay hökümitining tunji qétim wirus yuqumida ademlerning ölüshini étirap qilghanliqi bolup, ularning ilgiriki waqitlarda tekrarlap kéliwatqan bayanliridin zor derijide perq qilidu. Yene kélip xitayda az dégendimu bir milyon kishining tajsiman wirusi tüpeylidin ölüshi texmin qiliniwatqanda bu xil yéngi ölchemning élan qilinishi her sahe kishilirining zor diqqitini qozghimaqta.