Xitay ladax rayonigha yéqin xoten herbiy bazisidiki ayropilan yolini ishqa kirishtürgen

Xitay bilen hindistanning munasiwiti jiddiyliship qalghan bir mezgilde, xitayning xotendiki hawa armiye bazisi xitayning herbiy herikitide hel qilghuch rol oynaydighan haletke kelgen.

Bu heqte hindistan “Yéngi déhli” gézitining 8-aprél bergen xewiride mundaq déyilgen: “Xitay özliri ishghal qiliwalghan sherqiy türkistan (hazirqi shinjang) ning xoten diyarida ikki ayropilan yolini yasap, bu hepte ishqa kirishtürdi. Bu heriket herbiy dawalghush ichide turghan mezkur rayonda esker we qoral köpeytish  teqezzasini peyda qilidu”.

Bu xewerde éytilishiche, hindistan dölet mudapi'esi we xewpsizlik organliri sün'iy hemrahtin tartqan süretlerde, xotendiki ikkinchi ayropilan yolining resmiy ishqa kirishtürülgenliki hemde bu hawa armiye bazisining ladax rayonigha eng yéqin yerge jaylashqanliqi melum bolghan. Bu ayropilan yolining uzunluqi 3700 métir bolup, bu yolni boylap bir qisim herbiy qurulushlar, binalar sélin'ghan.

 Xewerde éytilishiche, 2020-yil hindistan bilen xitay arisida chégra soqushi yüz bergendin buyan, xitay hökümiti tibet we Uyghur rayonining hindistan'gha chégradash rayonlirida ayrodurum, tik uchar qonush orni, tömür yol, köwrük qatarliq herbiy eslihe qurulushlirini köpeytken.

Gerche xitayning xotendiki hawa armiye bazisida jiddiy heriket körülmigen bolsimu, xitay armiyesi, jümlidin hawa armiyesining bu bazidin haman bir küni paydilinip heriket qozghaydighanliqi texmin qilinmaqta iken. Hindistan dölet mudapi'e ministirliqidin bérilgen uchurgha köre, ular ladax rayonining sherqidiki herbiy bazisi we herbiy eslihelirini qaytidin kücheytishke kirishken.