Хитайда чәт әл мәблиғиниң еқип кетиши рекорт яратмақта

“блумберг хәвәрлири” ниң 17-декабирдики хәвиридә ейтилишичә, йиллардин буян хитайға мәбләғ қилип селинған чәт әл капиталиниң хитайдин еқип чиқип кетиши ноябирда тарихтики әң юқири рекортни яратқан. Хитай банкилири өткән бир ай ичидә 45 милярд америка доллиридин көпрәк капитални херидарларниң тәлипи бойичә уларниң хитай сиртидики банка һесабатлириға йөткәп бәргән. Бу сан өктәбир ейида 25 милярд доллар болған икән.

Хәвәрдә ейтилишичә, чәт әл мәблиғиниң бундақ зор көләмдә хитайдин еқип кетишидә йеңи нөвәтлик һөкүмәт пирезиденти доналд трампниң хитайдин келидиған таварларға 60 пирсәнт таможна беҗи қоймақчи болуши һәл қилғуч рол ойниған амил һесаблинидикән. Мизухо банкисидики асия иқтисади мутәхәссиси кен чоң (Ken Cheung) бу һәқтә тохтилип, “америка һөкүмитиниң таможна беҗи қоймақчи болуши вә өсүм нисбитидики пәрқләр бу хил йүзлинишкә от яқти. Долларниң артуқчилиқи болса буниңдики йәнә бир сәвәб” дегән.

Мәбләғ салғучилар әң көп мәслиһәт алидиған “финимайиз” (Finimize) ториниң бу һәқтики хәвиридә ейтилишичә, хитай пулиниң америка доллири билән айривашлаш қиммити давамлиқ төвәнләватқан болуп, бу һал йәнә бир яқтин хитай иқтисадидики чөкүшниң әң җанлиқ испати һесаблинидикән. Хитайдики пай чеки базириниң төвәнлиши, хәлқ пулиниң курси чүшүши, чәт әл мәблиғиниң еқип кетиши дегәнләр хитай һөкүмити иҗра қиливатқан иқтисадни җанландуруш тәдбирлириниң карға кәлмәйватқанлиқини, шуниңдәк хитайдики төвән истемалда көрүнәрлик яхшилинишниң болмиғанлиқини көрситиду, дәп қаралмақта.