Xitay lopnur nahiyeside yipek yoli turaliri muzéyi échip, “Qedimki turalar seddichinning dawami” dégenni bazargha saldi

Xitay da'iriliri Uyghur diyarining lopnur nahiyeside “Könchi deryasi turalar topi seddichin medeniyet baghchisi”namliq bir tur muzéyi échip, “Qedimki turalar seddichinning dawami” dégen qarashni resmiy hökümet teshwiqati süpitide bazargha salghan.

 “Shinjang géziti” ning xewiridin melum bolushiche, kölimi 5000 kiwadrat métirliq bu muzéyning échilish murasimi 29-dékabir küni daghdughiliq ötküzülgen. Sirtqi qurulush shekli turalargha oxshitip layihelen'gen bu muzéyning omumiy körgezme kölimi 2520 kiwadrat métir bolup, uninggha 600 dek medeniy yadikarliq qoyulghanliqi qeyt qilinmaqta.

Melum bolushiche, bu muzéy xitayning 2017-yilidin bashlan'ghan atalmish “Shinjangni medeniyet bilen ozuqlandurush” herikiti arqiliq Uyghur tarixini qayta yézish pilanining bir parchisi bolup, bu muzéy arqiliq kishilerde “Uyghur diyaridiki qedimki turalar seddichinning dawami” dégen qarashni  shekillendürüp, ulargha “Shinjang ezeldin xitayning parchisi ”dégen tonushni singdürüshni meqset qilidiken.

Xitay hökümiti 2017-yildin bashlap Uyghur rayonidiki muzéylarni tüptin özgertipla qalmay, nurghun meblegh sélip yéngi zamaniwi muzéylarni qurghan. Bu muzéylarda ilgiri körgezme qilin'ghan Uyghur tarixigha a'it nurghun medeniy yadikarliqlar éliwétilgenidi . “Shinjang géziti” ning bu xewiride, “Könchi deryasi turalar topi seddichin medeniyet baghchisi” muzéyining 5 bölek, 17 körgezme zalidin teshkil tapqanliqi éytilghan hemde “Bu körgezmide tarixiy yadikarliqlar , menzire namayendisi, neqmeydan tejribisi arqiliq ulugh seddichin tarixining mezmuni janliq yorutup bérildi” déyilgen. Xewerde yene bu muzéyning “Shinjangdiki turalar arqiliq seddichinning séhri küchini namayan qilip, köp qutupluq bir gewde bolghan jungxu'a medeniyiti chüshinish sehnisi” bilen teminligenliki bildürülgen. Halbuki, xitayning sherqte shenxeygüendin bashlinip, gherbte gensuning jyayügüen'giche dawamlishidighan seddichin sépilining miladidin burunqi 3-esirlerdin bashlap shimaldiki honlardin mudapi'e körüsh üchün sélin'ghanliqi hemmisige melum.